Սայաթ-Նովա համայնքում տեղի ունեցած դանակահարության հետքերով...

Մուրադ  Մուրադյանը՝ մեր օրերի  Ռեմբո՞ն է...

Fnews.am-ը քիչ առաջ տեղեկացրել էր այն մասին, որ  Արարատի մարզի Սայաթ-Նովա համայնքում տեղի է ունեցել դանակահարություն: Շրջանառվող վարկածներից մեկի համաձայն, ՀՀԿ ռեյտինգային ընտրակարգով առաջադրված թեկնածու Մուրադ Մուրադյանի շտաբի պատասխանատուն դանակահարել է ԲՀԿ շտաբի պետի պատասխանատուներից մեկին:

Դանակահարության լուրը,  Fnews.am-ի հետ զրույցում հաստատեցին ՀՀ ոստիկանության հասարակայնության հետ կապի և լրատվության վարչությունից:Այնտեղից մեզ հայտնեցին, որ  Մասիսի բժշկական կենտրոնից հաղորդագրություն է ստացվել այն մասին, որ որովայնի վիրավորումովհիվանդանոց է տեղափոխվել մի երիտասարդ:

«Ավելին՝ տվյալներ չկան, այս պահին մեր ոստիկանները տեղում պարզում են դեպքի հանգամանքերը»,-ասաց մեր զրուցակիցը:

Մասիսի բժշկական կենտրոնից էլ, մեզ հետ զրույցում հերթապահ մասի բուժաշխատողը տեղեկացրեց, որ երիտասարդին ժամը 16:00-ի սահմաններում տեղափոխել են Երևան՝ Էրեբունի բժշկական կենտրոն:

Այս լուրը հաստատեց նաեւ  Էրեբունի բժշկական կենտրոնի Ուրոլոգիական բաժանմունքի վարիչ, բժշկական կենտրոնի գործադիր տնօրեն Միքայել Մանուկյանը:

«Ես չգիտեմ, թե ով է այդ երիտասարդը. չգիտեմ կուսակցական է, թե ոչ, բայց Մասիսից մեզ մոտ են տեղափոխել 23-ամյա երիտասարդի՝ ձախ կողի որովայնի ծակող կտրող վնասվածքով: Այժմ նա վիրահատարանում է, եթե չեմ սխալվում անունն Աբրահամ է»,-ասաց բժիշկը:
Դեպքի հետ կապված մանրամասներ ճշտելու համար Fnews.am-ը փորձեց կապ հաստատել Արարատի նախկին ոստիկանապետ, ՀՀԿ կառույցի պատասխանատու Ալիկ Սարգսյանի հետ: Վերջինս կարճ պատասխանեց. «Ես հիմա ոչինիչ չեմ կարող ասել, խորհրդակցություն է հրավիրված, մարդիկ նստած են… կներեք»,-ասաց և անջատեց հեռախոսը:

Ի դեպ, այս պահին բավականին լարված մթնոլորտ է տիրում «Ծառուկյան Դաշինք»-ում, քանի որ դանակահարված երիտասարդը Ծառուկյան դաշինքի ներկայացուցիչ է` Աբրահամ Ադամյանը,  իսկ ԱԺ պատգամավորության թեկնածու՝ ՀՀԿ-ական Մուրադ Մոււրադյանն էլ, ում շտաբի պատասխանատուի  անվան հետ է  կապվում  տեղի ունեցած միջադեպը, հեռախոսներն անջատել ու ընդհատակ է անցել: 

Աբրահամ Ադամյանին դանակահարողը՝Արթուր Հայրապետյանն է, ով Արարատի մարզում ռեյտինգայով առաջադրված ՀՀԿ-ական Մուրադ Մուրադյանի  մոլի համակիրներից է:

Թե ինչով կավարտվի այս միջադեպը, առայժմ դժվար է ասել, բայց որ Մուրադ Մուրադյանի շրջապատն  այս օրերին հուլիվուդյան բոյեվիկներում նկարահանվելու առաջարկ կստանա չի բացառվում... Մի պարզ պատճառով. Ռեմբոների պակաս չի նկատվում ՀՀԿ-ի շարքերում: Հիշեցնենք, որ այս տիտղոսին լիարժեքորեն կարող է արժանանալ հենց Մուրադ Մուրադյանը, ում անունը մի քանի օր առաջ էլ ծեծ ու ջարդի հետ էր կապվում: Հետաքրքիր է, թե Մուրադ Մուրադյան օրենսդիրը՝ ինչով է տարբերվում ՀՀԿ-ի այն հայտնի բդեշխներից ու  կրիմինալներից, որոնց ի վերջո ՀՀԿ-ն սկսել է վտարել իր շարքերից:

Հ.Գ Հիշեցնենք, որ ՀՀԿ վերնախավը օրեր առաջ, ռեյտինգայինով առաջադրված թեկնածուներին կարգի էիր հրավիրել, եւ խիստ զգուշացում էր տրվել,  որ   ՀՀԿ-ականները  այլեւս ռինգ չմտնեն եւ ձեռքներին ազատություն չտան: 

Իսկ ՀՀԿ-ական կարկառուն թեկնածու Մուրադ Մուրադյանին խստիվ զգուշացվել էր` այլեւս բախումների դաշտ չմտնել,  եւ  կռիվ-ղալմաղալներ չանել:

Այնինչ,պատկերը գնալով  առավել խայտառակ է դառնում...