«Սեմուր ընդ Կո»-ի եւ «Ռիվալ» ՍՊԸ-ի խնդիրը մեկն է. պետությունից ստանալ անվտանգության երաշխիքներ

«Արմօյլ» ընկերության տնօրեն Ալֆրեդ Աբեդին Aravot.am-ի հետ զրույցում մեկնաբանելով Եղվարդում Նատի բնակելի թաղամասի հարեւանությամբ գտնվող «Ռիվալ» չրերի արտադրամասի տնօրինության մեղադրանքներն այն մասին, որ հարեւանությամբ կառուցվող (աշխատանքը նախատեսվում է սկսել առաջիկա ամիսներին) նավթամթերքի գործարանը սպառնում է իրենց արտադրությանը, շրջակա միջավայրին ու բնակիչների առողջությանը, մասնավորապես ասել է. «Իրականում բողոքի գործողություններ չկան: Դրանք ուղղորդված են «Սեմուր ընդ կո» եւ «Ռիվալ» ՍՊԸ-ների տնօրինության կողմից: Տնօրեն Ռաֆիկ Վիրաբյանն է ուղղորդում»:
Վերոհիշյալի առնչությամբ, ահա թե ինչ պարզաբանումէ ներկայացնում  «Սեմուր ընդ կո» ընկերության հանրային կապերի պատասխանատու Ելիզավետա Ասատրյանը, ով նախ անդրադառնալով այդ թնջուկի  նախապատմությանը, նկատեց.
-Պետք է ասեմ, որ այս կոնֆլիկտը սկսվել է 2016 թվականից: Երբ ինքը հայտարեց, որ այդտեղ լինելու են պահեստներ, ոչ թե նավթավերամշակման գործարան: Մենք էլ համաձայն էլ ենք, որ մեր հարեւանությամբ նոր արտադրություն է սկսվել, եւ որ այն որեւէ վտանգ չի պարունակելու: Դրանից հետո 2017թվականին իրենց իսկ կայքէջից տեղեկացանք, որ այդտեղ ոչ թե պահեստներ են լինելու, այլ նավաթավերամշակման գործարան: Բնականաբար «Սեմուր ընդ կո»-ին կից գործող «Ռիվալ» չրերի գործարանը անհանգստացավ այդ հարցի շուրջ, քանի որ չի կարող լինել նույն վայրում էկո մաքուր սննունդ արտադրող ընկերություն եւ նավթավերամշակման արտադրություն: Բնականաբար մենք մեր անհանգստությունը փոխանցել ենք Կառավարությանը եւ տարբեր գերատեսչությունների: Եվ երբեւիցէ չենք փորձել որեւէ մեկին, այդ թվում գյուղացիներին հրահրել բողոքի ակցիաներ կազմակերպելուն: Պարզապես գյուղացիների բողոքներին, միացել էին նաեւ «Ռիվալ» ՍՊԸ-ի աշխատակիցները: Ընդամենը սա է պատկերը:
- Լավ, իսկ նախկինում, երբ տվել եք նախնական համաձայնություն` չե՞ք փորձել առավել մանրամասն տեղեկանալ:
- Իրենք ընդամեն մեզանից, որպես տնտեսվարող սուբյեկտի թույլտվություն են խնդրել, որպեսզի իրենց պահեստը կառուցեն: Այդ փաստաթղթղի մեջ այդպես էլ գրված է, մենք էլ չենք պահանջել փաստաթուղթ, որովհետեւ ո'չ շինթույլտվություն տրամադրողն ենք, ո՛չ էլ քաղաքապետարանը:

Ինչ վերաբերում «Արմօյլ» ընկերության տնօրեն Ալֆրեդ Աբեդի նույն լրատվամիջոցի հետ զրույցում հետեւյալ պնդմանը. «Մի չրանոցն (նկատի ունի՝ «Ռիվալ» ՍՊԸ-ն) իր աշխատողին չի կարողանում պահել, որովհետեւ 80 հազար դրամ աշխատավարձ է տալիս», -Ելիզավետա Ասատրյանը նկատեց.

-Ես պաշտոնապես հայտարարում եմ, որ մեզ մոտ միջին աշխատավարձը 200 հազար դրամ է: Այս կերպ փորձ է արվում  հանրությանը շեղել  բուն խնդրից: Պարզ մանիպուլյացիոն խաղ է գնում: Եվ «Սեմուր ընդ կո»-ի եւ «Ռիվալ» ՍՊԸ-ի խնդիրը մեկն է. պետությունից ստանալ անվտանգության երաշխիքներ: Մեր երկու տարվա պահանջը սա է եղել, որպեսզի մենք չկորցնենք կայուն բիզնես ծրագիր հանդիսացող գործարան, որը արտադրում է մաքուր սնունդ: