«Սերժ Սարգսյանն ու Մանվել Գրիգորյանը նոր չեն ընկերացել, որ ավազի վրա էլ բան սարքեին»

shamshyan.com-ի հարցերին պատասխանել է ԱԺ պատգամավոր, գեներալ Սեյրան Սարոյանը՝ արձագանքելով այն մեղադրանքներին, թե ԵԿՄ նախագահ, գեներալ-լեյտենանտ Մանվել Գրիգորյանը սկսել է քաղաքական պատվերներ իրականացնել

– Կարծիք կա, որ ԵԿՄ-ում շատ անդամներ կան, ովքեր չեն կռվել: Աստված մի արասցե, կռվի դեպքում ինչպե՞ս ենք պաշտպանվելու:

- Ախր այդ խոսողները…, որ ասում են, թե այսօրվա երկրապահը կռվող տղաների հետ կապ չունի, բա այդ հաղթանակն ո՞վ է տարել, իրե՞նք: Ինչի՞ համար են նախանձում, կամ թե այդ ի՞նչ լավ բան կա պատերազմի մեջ, որ նախանձում են: Երկրապահը ո՞նց կարող է միֆ լինի, բա այդ պատերազմն ո՞վ է հաղթել: Ինչպե՞ս կարելի է դա մոռանալ կամ վարկաբեկել: Ես զարմանում եմ նման մարդկանց վրա: Այդ կառույցը, որ կյանք է տվել, կյանք չի խնայել, և դնել ու այսպես մրոտե՞լ:

Կռվող տղերքը բոլորը երկրապահ են: Այն ասողները, թե իբր, իրական կռվող հրամանատարները երբեք էլ չեն եղել երկրապահ, իրականում չեն տիրապետում իրավիճակին և նույնիսկ մոտ չեն երկրապահին: Թող մեկ անգամ գոնե մոտենան այդ, իր ասած հրամանատարներին և հարցնեն՝ երկրապահ եղե՞լ է, թե՞ ոչ: Հո ասելով չէ՞:

Մենք ամբողջ պատերազմը միասին ենք անցել, այդ ո՞նց եղավ, որ Սամվել Բաբայանն այդ նույն մարդկանց ընկերն ու եղբայրը չէ: Հնարավոր է, որ ինչ-որ հարցերով համամիտ չեն եղել, բայց դա չի նշանակում, որ թշնամաբար են տրամադրված կամ թշնամի են:

Միասին մի մեծ պատերազմ են անցել, չի կարող նման բան լինել: Առանց զոհերի հաղթանակ չի լինում, այն մարդիկ, ովքեր անիմաստ խոսում են, պարզապես ոչինչ չեն հասկանում: Մեր հերոսաբար կռված տղերքին անարժեք են սարքում՞ ի՞նչ է նշանակում «տարան-սպանեցին»: Պատերազմի դաշտում հո չե՞ս որոշում՝ ով պետք է մեռնի, ով սաղ մնա: Ադրբեջանն իր պարտված հրամանատարներին հերոս է դարձնում, հերոսի կոչում են տալիս, իսկ մենք մեր հաղթածներին, մեր հողերը հետ վերցրածներին նման բաներ ենք ասում: Չի՛ կարելի: Որ մեզ վրա ցեխ են շպրտում, վաղը, որ Աստված չանի, պատերազմ լինի, ո՞վ պետք է գնա, էլի մենք:

Չգիտեմ՝ ում խնդիրն են կատարում, բայց շատ վատ բան են անում: Հայրենասեր, խելացի մարդը հաղթող հրամանատարի վրա նման ցեխ չի շպրտի:

- Կարծիքներ են հնչում, թե Մանվել Գրիգորյանն իր պահվածքով փորձում է նախագահ Սերժ Սարգսյանին սիրաշահել. քաղաքական պատվեր է կատարում: - Սերժ Սարգսյանը երբեք երկրապահից հեռու չի եղել, միշտ էլ երկրապահի մեջ է եղել և երբեք էլ չի հրաժարվել, որ երկրապահ է: Մենք՝ պատերազմից եկածներս, բոլորս էլ իրար եղբայրներ ենք: Եթե քաղաքական առումով ուզում են որևէ բան ասել, ավելի լավ է պարզ խոսեն: Երկրապահի ծնված օրվանից Ս. Սարգսյանը երկրապահ է եղել:

Սերժ Սարգսյանն ու Մանվել Գրիգորյանը նոր չեն ընկերացել, որ ավազի վրա էլ բան սարքեին: Երկրապահը երբեք չի փորձել քաղաքականության մեջ մտնել, այն ստեղծվել է երկիրը պահպանելու համար:

մանրամասները՝ սկզբնաղբյուրում