Սերգո Կարապետյանի աշխատանքային այցը Ավստրիա

Մայիսի 4-ին պաշտոնական այցով Ավստրիայում գտնվող ՀՀ գյուղատնտեսության նախարար Սերգո Կարապետյանը հանդիպում ունեցավ Ավստրիայի գյուղատնտեսության, անտառտնտեսության, բնապահպանության և ջրային տնտեսության դաշնային նախարար Անդրե Ռուպրեխտերի հետ: Այցի ընթացքում նախարարին և նրա գլխավորած պատվիրակությանն ուղեկցում էր Ավստրիայում ՀՀ դեսպան Արման Կիրակոսյանը:

Հանդիպման ընթացքում քննարկվեցին երկու երկրների միջև գյուղատնտեսության ոլորտում համագործակցության հնարավոր ուղղությունները, դրանց ընդլայնման հեռանկարները, ինչպես նաև երկկողմ հետաքրքրություն ներկայացնող այլ հարցեր: Կողմերը հատկապես շեշտեցին անասնաբուծության և կաթնամթերքի արտադրության բնագավառներում համագործակցության զարգացման անհրաժեշտությունը: ՀՀ գյուղատնտեսության նախարար Սերգո Կարապետյանը կարևորեց Ավստրիայի հետ համագործակցության շրջանակում տոհմային կենդանիների ներկրման ծրագիրը, որը նախատեսում է բարելավել գյուղատնտեսական կենդանիների գենետիկական հատկանիշները, ինչպես նաև կենդանիների համարակալման և առողջության բարելավման արդիական համակարգի ներդրումը:

Նախարարներն ընդգծեցին իրենց ղեկավարած գերատեսչությունների միջև փորձի և գիտական տեղեկատվության փոխանակման անհրաժեշտությունը, մասնավորապես օրգանական գյուղատնտեսության, գյուղատնտեսական կոոպերատիվների, հացահատիկային մշակաբույսերի սերմնաբուծության, անտառների կայուն կառավարման բնագավառներում: Նախարար Սերգո Կարապետյանն ավստրիացի գործընկերոջը հրավիրեց այցելել Հայաստան:

Հանդիպման ավարտին երկու երկրների նախարարները ստորագրեցին փոխըմբռնման հուշագիր Հայաստանի գյուղատնտեսության նախարարության և Ավստրիայի գյուղատնտեսության, անտառտնտեսության, բնապահպանության և ջրային տնտեսության դաշնային նախարարության միջև գյուղատնտեսության և անտառային տնտեսության բնագավառներում համագործակցության մասին:

Նույն օրը նախարար Կարապետյանը հանդիպումներ ունեցավ նաև Ավստրիայի Եվրոպական ինտեգրման և արտաքին գործերի նախարարության միջազգային համագործակցության և միջազգային զարգացման քաղաքականության բաժանմունքի ղեկավար, դեսպան Պետեր Լաունսկիի, ինչպես նաև Ավստրիայի զարգացման գործակալության ղեկավար Մարտին Լեդոլտերի հետ: Քննարկվեցին երկկողմ հետաքրքրություն ներկայացնող հարցեր, մասնավորապես գործակալության կողմից Հայաստանում արդեն իսկ իրականացված և նախանշվող ծրագրերի շուրջ: Պարոն Կարապետյանը, կարևորելով հատկապես անասնաբուծության բնագավառում զարգացման ծրագրեր իրականացնելու կարևորությունը, առաջարկեց ավստրիական կողմին ուսումնասիրել Հայաստանում տոհմային անասնաբուծական տնտեսություն հիմնելու, գյուղատնտեսական կենդանիների հաշվառման և համարակալման համակարգ ներդնելու հնարավորությունները: Հանդիպումների ընթացքում անդրադարձ եղավ նաև Հայաստանի` Եվրասիական տնտեսական միությանն անդամակցության պայմաններում Հայաստանի և ԵՄ պետությունների հետագա համագործակցության հարցին: Նախարար Կարապետյանը նշեց, որ Հայաստանի համար եվրոպական երկրների հետ համագործակցությունը համարվում է առաջնային ուղղություն, և դրա համար առկա են իրատեսական հնարավորություններ: Մասնավորապես նպատակահարմար է եվրոպական ներդրումներով Հայաստանում կազմակերպել կաթի, մսի, բանջարեղենի, մրգի վերամշակման գործարաններ՝ պատրաստի արտադրանքը դեպի ԵՏՄ երկրներ արտահանելու հեռանկարով:

Ավստրիական կողմը պատրաստակամություն հայտնեց ուսումնասիրել ներկայացված առաջարկությունները և առաջիկայում գործնական քայլեր իրականացնել` բոլոր այս ոլորտներում համագործակցություն ծավալելու ուղղությամբ: