Սերս գաղտնի թող մնա.Արգամիչի գործն էլ մի գործ չի...

Այլընտրանքային  ընդդիմության սիրելի վարչապետը, որի նշանակման համար քառյակ-եռյակը ժամանակին պայքարում էր, կարծես թե սկսում է կորցնել իր ռեյտինգը նույն այլընտրաքաընդդիմության շրջանում: Բանն այն է, որ օրերս համացանցում շրջանառվող տեղեկությունների համաձայն՝ Քոչարյանը լրագրողների հետ փակ հանդիպման ընթացքում դժգոհել է Հովիկ Աբրահամյանից: Դրան հաջորդեց եռյակի հանրահավաքը հոկտեմբերի 10-ին, որտեղ արդեն եռյակի ներկայացուցիչները եթե ոչ ուղղակի, ապա գոնե անուղղակի կերպով պահանջեցին նաև վարչապետի հրաժարականը՝ հասկացնելով, որ դժգոհ են նրա գործունեությունից: Եթե առաջին իրադարձությունը` (Քոչարյանի դժգոհությունը) ,համապատասխանում է իրականությանը, ապա երկրորդի կապը առաջինի հետ դառնում է տրամաբանական այնքանով, որքանով որ տրամաբանական է Քոչարյան-եռյակ կապը:
Սիրային հարաբերություններում որպես կանոն սկզբնական փուլը միշտ բավականին կրքոտ է լինում: Հետո անցնում է մեղրամիսի շրջանը և կրքերն աստիճանաբար սկսում են մարել: Հետևելով վերջին օրերի իրադարձություններին՝ կարող եմ եզրակացնել, որ վարչապետ-եռյակ «բուռն սիրո» կրքերի մարումն արդեն մեկնարկեց:
12կետերի պատասխանը տալով և դիմադրություն չստանալով՝ Հովիկ Աբրահամյանը հավանաբար համարեց, որ իր առաքելությունը հաջողությամբ կատարել է՝ կարողացել է զսպել խնամուն կամ էլ միգուցե հենց խնամու հետ պայմանավորվածությամբ զգուշորեն «փակել» են հարցը: Բայց հանրահավաքից արդեն պարզ եղավ, որ հարցը այդքան էլ փակված չէ, որովհետև միգուցե այդպես ցանկացավ երկրորդ նախագահը:
Այսպիսով, Հովիկ Աբրահամյանին՝ Վաշինգտոնից վերադառնալուց հետո արդեն մի փոքր ավելի բարդ իրավիճակ է սպասվում. նա կարծես թե զրկվում է իր հավատարիմ «փաստաբաններից» և ստիպված կլինի ապավինել միայն իշխանական կողմի «սիրուն» ու վստահությանը, ինչը նույնպես կասկած է հարուցում, քանի որ վստահության դեպքում հանրահավաքին ընդառաջ նրան հանկարծակի չէին «գործուղի» ԱՄՆ:
Փաստորեն, վարչապետը հայտնվում է մի իրադրության մեջ, երբ նա փաստացի չկարողացավ լուծել իր առջև դրված դրված խնդիրը և երկու կողմին էլ չգոհացրեց: Թե որքան նա կկարողանա այս պայմաններում շարունակել գործելը՝ դեռ դժվար է ասել, բայց մի բան պարզ է՝ Արգամիչի գործն էլ մի գործ չի:

Կարճ  ասած, Արգամիչ-ընդդիմություն-ընդիմության  թմբուկներ հին ու նոր եթերաշրջանի բուռն գործունեության, ու հատկապես Արգամիչի «փաստաբանների» ծավալած բազմաչարչար գործունեության մասին,   դեռ առիթ կունենանք առավել հանգամանալից խոսելու...

Կարեն  Վարդանյան