Սեղաններին առատ միրգ ու բանջարեղեն, թոնրի գաթա, փախլավա ու ղափամա.Գեղամավանը նշել է «Բերքի տոնը»

Գեղարքունիքի մարզի Գեղամավան գյուղի Աշոտ Աբրահամյանի անվան միջնակարգ դպրոցում անցկացվեց «Բերքի տոն» միջոցառումը, որը նվիրված էր աշնանը և բերքահավաքի աշխատանքներին:

«Արմենպրեսի» տեղեկացմամբ` դպրոցի նախակրթարանից մինչև 12-րդ դասարան դպրոցականները գյուղի ունեցած բերք ու բարիքով ծածկել էին սեղանները` բեռնված յուղ ու մեղրով, թոնրի գաթայով ու լավաշով, փախլավայով ու ղափամայով, Գեղամավանում աճող մրգերի ու բանջարեղենների բոլոր տեսակներով:

Հնչեց Տեր Նշան քահանա Սարգսյանի օրհնանքի խոսքը: Այնուհետև օրվա խորհուրդը իրենց խոսքերով մեկնեցին դպրոցի տնօրեն Շամամ Գրիգորյանը և գյուղապետ Մնացական Վարդանյանը: «Աշնան վառվռուն գույների խաղ է հիմա Գեղամավանի այգիներում ու դաշտերում՝ մրգերով ու բանջարեղեններով ծանրաբեռնված: Նայում ես այս ամենին, ու հոգիդ լցվում է անսահման ջերմությամբ հայ մարդու, հայ անխոնջ շինականի նկատմամբ: Չէ՞ որ այս ամենը նրա արարման ու տքնաջան աշխատանքի արդյունքն է: Խենթ տարերքի դեմ մաքառելով, ամեն քարի հետ կռիվ տալով է ստեղծել այս բերքն ու բարիքը: Եվ մենք մատաղ սերնդին պետք է դաստիարակենք արարման անվերջ ձգտումով: Եվ այս միջոցառումն այսուհետ կրելու է ավանդական բնույթ»,- իր խոսքում նշեց դպրոցի տնօրեն Շամամ Գրիգորյանը:

Մանկավարժներն ու աշակերտները հյուրերին դիմավորեցին աղ ու հացով: Ընտրված ժյուրին շրջեց սեղանից սեղան, գնահատեց աշխատանքները և յուրաքանչյուր սեղանի արժանացրեց նախապես սահմանված անվանակարգերի: Իսկ գլխավոր «Ոսկե աշուն» մրցանակը շնորհվեց նախակրթարանի փոքրիկներին: Տոնական միջոցառումը շարունակվեց մինչև ուշ երեկո՝ ուղեկցվելով երգ ու պարով, բազմաբովանդակ խաղերով , ուրախության ու հիացմունքի բազմաթիվ պահեր պարգևելով ներկաներին: Միջոցառումը ավարտվեց տոնական շքեղ հրավառությամբ: