«Շախ» և «մատ»

Անսպասելին իրավաչափ դարձնելու ՀՀ նախագահ Սերժ Սարգսյանի քաղաքական մտածողությունը թեև առաջին անգամ չէ, որ զարմացնում է քաղաքական ուժերին, այնուհանդերձ, փաստը մնում է փաստ, որ առաջադրելով Մեծ Բրիտանիայում ՀՀ դեսպան Արմեն Սարգսյանի թեկնածությունը որպես ՀՀ ապագա նախագահի՝ նա «շախ» և «մատ» խաղարկեց քաղաքական շախմատային տախտակի վրա:

Այս քայլը խառնեց բոլոր քաղաքական ուժերի հետագա քայլերը, այդ թվում` ՀՀԿ-ի ներսում: Եվ այսպես, Հայաստանի քաղաքական դաշտում բոլոր խաղացողները՝ ընդդիմադիր, կենտրոնամետ, թե իշխանական, գուցե և իրենց մեջ ընդվզեն, սակայն գլխավոր քայլը կատարված է, և բոլորն էլ հասկանում են, որ ոչ մի այլ թեկնածու չի դիմանա ներկայացված թեկնածուի կշռին: Իհարկե, այն փաստը, որ Արմեն Սարգսյանի թեկնածությունը ներկայացրել է Սերժ Սարգսյանը, արդեն իսկ նշանակում է, որ ՀՀԿ-ն պաշտպանելու է այս թեկնածուին: Արմեն Սարգսյանի օգտին կաշխատի նաև ՀՅԴ-ն, ինչի մասին երկու օր առաջ արդեն հայտարարել է: Թեև ԲՀԿ-ն ասել էր, որ ներկայացված թեկնածուի վերաբերյալ իր խոսքը կասի նրա հետ հանդիպումից հետո, կարծում ենք, որ նա ևս այս թեկնածուի օգտին հանդես կգա: 
Նկատենք, որ Արմեն Սարգսյանի թեկնածությունը և՛ մտավորական, և՛ գործարար խավի սրտով է, ինչը բնական է: Մեծ Բրիտանիայում ՀՀ-ի դեսպանը աշխարհում ճանաչված է որպես բարձր ինտելեկտի տեր անձնավորություն և հմուտ գործարար: Եթե նկատենք, որ 2018-ի ապրիլից հետո, ըստ փոփոխված սահմանադրության, ՀՀ նախագահի պաշտոնը ներկայացուցչական բնույթի է լինելու, ապա ավելի լավ թեկնածու դժվար թե կարելի էր գտնել: Ավելին, Արմեն Սարգսյանի տասնյակ տարիների կապերը, միջազգային, քաղաքական և գործարար դաշտում, կարող են շատ դրական ազդեցություն ունենալ Հայաստանի համար: Իհարկե, այդ գործընթացը մեծապես պայմանավորված կլինի նրանով, թե ով կստանձնի ՀՀ վարչապետի պաշտոնը:

Ժասմեն ՎԻԼՅԱՆ