Շիրակի մարզպետը`Գյումրին գողական քաղաք համարվելու, ու իր հնարավոր պաշտոնանկության մասին

Վերջին օրերին լայնորեն շրջանառության մեջ դրվեցին խոսակցություններն այն մասին, որ առաջիկայում մարզպետի պաշտոնին հրաժեշտ կտա Շիրակի մարզպետ Ֆելիքս Ցոլակյանը: Այս, ինչպես նաեւ Շիրակի մարզում, ըստ տեղի բնակիչների խոսքերի, օր-օրի շատացող աղքատության տեմպերի մասին, Fnews.am-ը մի քանի հարցադրում արեց  Շիրակի մարզպետ Ֆելիքս Ցոլակյանին: 

-Պարոն Ցոլակյան կիսո՞ւմ եք արդյոք Ձեր մարզի բնակիչների այն մտահոգությունները, ըստ որի մարզում աղքատության ցուցանիշը օր-օրի շատանում է:
- Չի շատանում, նույն վիճակն է, ինչ-որ եղել է, համարյա բան չի փոփոխվել: Շիրակն այսօր ամենաղքատ մարզն է` ասեմ Ձեզ իմանաք, ուստի, իհարկե, դա խնդիր է:

- Ըստ Ձեզ աղետի գոտի հասկացությունը ե՞րբ է վերանալու Շիրակի մարզից:

-Աղետի գոտի հասկացությունը ոչ միայն տնտեսական, այլեւ հոգեբանական հարց է: Պետք է կարողանալ մարդկանց հիշողություններից եւս այդ հասկացությունը վերացնել: Հետո աղետի գոտին օրվա հացի կամ վառելիքի հայթայթումը չէ, այլ` տնտեսական հարցերի լուծումը. երկրաշարժից տուժածներին բնակարաններով ապահովելը, նրանց համար համապատասխան պայմաններ ստեղծելը: Չնայած, հիմա էլ վերականգնվել է ավելի շատ, քան կարծում են: Աղետի գոտի լինելուց առաջ այդքան բնակարան չկար Գյումրիում, որքան հիմա կա: Բնակիչներից մոտ 460 մարդիկ կան, ովքեր Կառավարության կողմից հատկացված գումարներով բնակարաններով են ապահովվել: Աղետի գոտի հասկացությունն ավելի լայն հասկացողություն է, քան մարդիկ ասում ու պատկերացնում են: Այնպես, որ աղետի գոտի ասելով` չեն հասկանում` տուն կա, կամ չկա: Աղետի գոտու հարցը պետք է ավելի խորը դիտարկել: Այո, Շիրակի մազրում շատ են խնդիրները, բայց մենք ամեն ինչ անում ենք, որպեսզի լուծվեն դրանք: Կան վթարային շենքեր, քաղաքի բարեկարգման խնդիրներ, որոնք եւս անհրաժեշտություն են բարեկեցիկ կյանք ապահովելու համար
- Ամեն դեպքում Դուք ինքներդ փաստեցիք, որ Ձեր մարզը ամենաղքատ մարզն է, ի՞նչ եք անում խնդիրը քիչ թե շատ կարգավորելու ուղղությամբ:
- Դե առաջնային խնդիրը ներդրումներ անելն է, եւ աշխատատեղեր ստեղծելը:
- Իսկ ներդրումեր հիմա չկա՞ն:
- Ինչի չկան, կա, բայց մենք ավելի շատ մասնավոր ներդրումների կարիք ունենք, մասնավոր ներդրումների թիվը պետք է կարողանանք ավելացնել, սա է խնդիրը: Բնական է, որ աշխատատեղերի ավելացման դեպքում աղքատության տոկոսը կնվազի: Այնպես չէ, որ մասնավոր ներդրումներ մեզ մոտ չեն անում, ընդհակառակը, ավելի շատ մեզ մոտ են ներդրումներ անում, բայց սա բավարար չէ:
-Ինչպե՞ս եք վերաբերում այն խոսակցություններին, որ Գյումրին վաղուցվա գողականների քաղաք է:
- Դրանք սուտ, շինծու խոսակցություններ են, ոչ մի հիմք դրա տակ չկա: Ես չեմ ընդունում դա:
-Եվ, վերջում, իրականությանը համապատասխանում ե՞ն խոսակցություններն այն մասին, որ Դուք պատրաստվում եք լքել մարզպետի պաշտոնը:
- Իհարկե, ոչ: Չեմ էլ կարող ասել, թե ով է նման չճտված տեղեկություններ տարածում: Սուտ է, սուտ, ես հրաժարակ չեմ տալու, թող հանգիստ մնան նման լուրեր տարածողները:
- Իսկ, ովքե՞ր են, ըստ Ձեզ նման լուրեր տարածողները:
- Ես չեմ բացառում ընդհանրապես ոչինչ եւ ոչ ոքի:

Տաթեւիկ  Աբրահամյան