Շների զբոսանքն իրականացնելու ժամանակ տիրապետողը պետք է ապահովի շրջապատող անձանց անվտանգությունը

ՓԱՍՏԱԲԱՆԻ ԱՆԿՅՈւՆ

Հարցին պատասխանել է ՀՀ Փաստաբանների Պալատի անդամ, փաստաբան Լիանա Բալյանը

-Երեւան քաղաքի բնակիչ Ն. Ալավերդյան 

ՀԱՐՑ.

Կա արդյոք գործող օրենք ընտանի կենդանիներին բնակավայրերում, մանկական այգիներում կամ հարակից տարածքներում, ման տալու սահմանափակող օրենքներ: Ենթադրենք պարտադիր դնչկալի առկայություն, որ դեպքերում որ վայրերում, կամ պարտադիր վզկապի առկայությամբ որ դեպքերում որ վայրերում: Եթե կա խնդրում եմ արձագանքեք:

ՊԱՏԱՍԽԱՆ 

Երևան քաղաքի ավագանին 24.10.2011թ.-ին N 312-Ն որոշմամբ որոշել է, որ բազմաբնակարան շենքերի ընդհանուր օգտագործման տարածքներում կենդանիներ պահելն արգելվում է։
Կենդանիների զբոսանքը թույլատրվում է միայն այդ նպատակով հատուկ հատկացված տարածքներում։ Նման տարածքների բացակայության դեպքում զբոսանքը կարող է իրականացվել ամայի կամ խոտածածկ տարածքներում, բացառությամբ կրթական, մշակութային, սպորտային, առողջապահական կազմակերպություններին (հիմնարկներին) հարող տարածքների, մանկական հրապարակների և շուկաների տարածքների։
Շների զբոսանքն իրականացնելու ժամանակ տիրապետողը պետք է ապահովի շրջապատող անձանց անվտանգությունը։
Ագրեսիվ շանը պահել դնչկալով՝ մայթերով շարժման ժամանակ, հետիոտնի ճանապարհին, մարդաշատ վայրերում և երթևեկության հատման մասերում։
Կենդանի տիրապետողը պարտավոր է՝
բացառել կենդանու կողմից ընդհանուր օգտագործման տարածքների, բազմաբնակարան շենքերի ընդհանուր օգտագործման տարածքների, բակերի, մայթերի, փողոցների, սիզամարգերի, ինչպես նաև հանգստյան կանաչ գոտիների աղտոտումը,
ապահովել յուրաքանչյուր անձի անվտանգությունը և անդորրը կենդանու ազդեցությունից, այդ թվում` առանց դնչկալի կամ վնասազերծման ապահովման
Արգելվում է՝
կենդանուն գրգռել մարդկանց և կենդանիների վրա
շանը զբոսանքի տանելը մանկական հրապարակներում, առողջապահական, կրթական, մշակույթի, սպորտի հիմնարկների և շուկաների տարածքներում:

Հ. Գ

Այդուհանդերձ, եթե շան տերերը տարեկան պետտուրք են վճարում ագրեսիվ շների գոյության համար, դա դեռ չի նշանակում, որ այս դեպքում բազմաբնակարան շենքերում, ինչ ուզեն՝ կարող են անել և շանը որտեղ ուզեն պետք է ման տան:
Այսօր հարցն իրականում խնդրահարույց է , և Քաղաքապետարանն ու թաղապետարանները պետք է լուրջ մոտեցում ցուցաբերեն՝ հստակություն մտցնելու թե ում են թույլտվություն տալիս շուն պահել, և արդյո՞ք շուն պահողը հոգեպես առողջ է թե ոչ, և շունը վայրենի ու ագրեսիվ է թե ոչ:Եվ արդյոք շուն պահողը հետագայում շունը որպես զենք չի օգտագործի՝ բազմաբնակարան շենքերի բնակիչներին վախեցնելու, եւ գուցե նաեւ վնաս տալու  համար օրինակ…