Շուշան Պետրոսյանը հաստատում է՝ իր և քաղաքացու միջև միջադեպ եղել է. երգչուհին մանրամասնում է

Երեկ՝ դեկտեմբերի 14-ին, ոստիկանություն է դիմել Երևանի բնակիչ 56-ամյա Ելենա Պետրոսյանը։ Վերջինս ահազանգել է ոստիկանություն և հայտնել, որ նույն օրը ժամը 12։40-ի սահմաններում Կորյունի փողոցում գործող «Արմենիա» խանութում իր հետ վիճաբանության ժամանակ Երևանի բնակիչ Շուշան Պետրոսյանը ձեռքերով հարվածներ է հասցրել իր մարմնի տարբեր մասերին՝ պատճառելով ֆիզիկական ցավ։ 

Ըստ տարածված տեղեկության՝ Շ․Պետրոսյանը հայտնի, ճանաչված ու սիրված երգչուհի Շուշան Պետրոսյանն է։ Տեղեկության իսկությունը ճշտելու նպատակով Լուրեր.com-ը կապ է հաստատել երգչուհի Շուշան Պետրոսյանի հետ, ով չի հերքել տարածված տեղեկությունը. «Մտա իմ տան կողքի խանութ՝ գնումներ կատարելու, ինչպես միշտ: Հայտնվեց մի կին և հայտարարեց, թե դավաճանները ինչ գործ ունեն մեր խանութում, ինձ անվանեց թալանչի, երկիրը ծախող, երկրորդ և երրորդ նախագահների ստրուկ, ասաց այնպիսի բաներ, որ ուղղակի շատ ամոթ է, և արդյունքում եղավ փոքրիկ միջադեպ»,- ասել է երգչուհին:

Ըստ վերջինիս՝ այդ միջադեպի մեղավորը միմիայն Նիկոլ Փաշինյանն է. «Ազգի մեջ ատելություն սերմանելով և պառակտություններ մտցնելով՝ ես չգիտեմ՝ ինչի հասավ ինքը: Անհարիր վերաբերմունք է, երբ դու մի երկրին այսքան սիրում ես ու նվիրված ես քաղաքին, հանգիստ մտնում ես քո փողոցի վրայի խանութը ու հանկարծ ինչ-որ մեկը մտնում է այդ խանութ ու այդպես անպատկառ է պահում իրեն: Այնքան կուտակված ատելություն կար այդ կնոջ մեջ, որ գուցե չէր էլ գիտակցում, թե ինչ է անում»,- նշել է Շուշան Պետրոսյանը:

Առավել մանրամասն՝ սկզբնաղբյուր կայքում