Շուշանիկ Բախշյանին մեղադրանք է առաջադրվել

Անցյալ տարվա հուլիսի 27-ին մահացած ծննդկան Մերի Մարգարյանի գործով կասկածյալ բժշկուհի Շուշանիկ Բախշյանին մեղադրանք է առաջադրվել. Այս մասին Fnews.am-ի թղթակցի հետ զրույցում ասաց նրա փաստաբան Ալեքսանդր Սիրունյանը: Նրան մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասով` (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը, որն անզգուշությամբ առաջացրել է բուժվող հիվանդի մահ): «Այս մեղադրանքի հետ համաձայն չենք, չենք ընդունում: Քննություն կկատարվի և կպարզվի որ Շուշանիկ Բախշյանը այս ամենի հետ ընդհանրապես կապ չունի: Ես նորից պնդում եմ, որ Շուշանիկը անմեղ է, նա պատասխանատվության չի ենթարկվի»,-ասաց Սիրունյանը` հավելելով, որ իրենք ունեն ապացույցներ, որ ծննդկանը ծանր հիվանդությունից է մահացել:

Հիշեցնենք, որ առաջին ատյանի դատարանի դատավոր Մնացական Մարտիրոսյանը հունվարի 23-ին ապօրինի էր համարել ծննդկան Մերի Մարգարյանի մահվան մեջ կասկածվող բժշկուհի Շուշանիկ Բախշյանի ձերբակալությունը եւ պարտավորեցրել քննիչին ազատ արձակել նրան: Դրանից հետո բժշկուհուն հիվանդանոց էին տեղափոխել: Մերի Մարգարյանի հարազատները, սակայն, համոզված են, որ այս ամենը բեմադրություն էր, իսկ Շուշանիկ Բախշյանն էլ առողջական խնդիր չուներ հոսպիտալացվելու համար: