8 Սեպտեմբեր, 2018

Սիրելի Նիկոլ, այսօր մաղթում եմ հաղթանակ Հայաստանին, կերտիր այն, խնդրում եմ

«Նախորդ օրը հաղթանակի մասին էի գրել, երեկ` պարտության: Երեկվանը շատ ավելի մեծ ուշադրության արժանացավ: Սպասելի՞ էր, երևի` այո: Ցավոք, մենք դեռ շատ ավելի մեծ հաճույքով կենտրոնանում ենք տարատեսակ պարտությունների, քան կոնկրետ հաղթանակների վրա` մամուլից մինչև սուրճի ընդմիջումների քննարկումներ: Ասում եմ ցավոք, քանի որ մի օր հակառակը տեսնելու մեծ հույս ունեմ:

Հիմա, ինչպես խոստացել էի, Փաշինյան-Պուտին հանդիպմանն ընդառաջ:

Սիրելի Նիկոլ, այսօր մաղթում եմ հաղթանակ Հայաստանին։ Կերտիր այն խնդրում եմ։ Իսկ եթե դրա համար պիտի պահանջվի անձնական պարտություն, ապա ժամանակի հզոր գործոնի մասին պետք չէ մոռանալ։ Քաղաքական առաջնորդներն անձնական ամեն ինչ ստորադասում են ազգային հաղթանակին, անցողիկը` մնայունին: Հաղթանակ մեր երկրին:

Դուխով»,-գրել է ՀՀ նախագահի խորհրդական Թևան Պողոսյանը ֆեյսբուքյան իր էջում:

Թևան Պողոսյանի նախկին գրառումները՝ ստորև.

«Հաղթանակ։ Շատ ու շատ հպարտություն կա այս բառի մեջ:

Ոգի կա, որ առաջ է հրավիրում, իսկ նոր սերնդին` օրինակ մատնացույց անում: Հուզմունք կա, որ դրական էներգիա է տալիս: Գեղեցիկ բառ է` հաղթանակ:

Այո, հաղթողներին չեն դատում։ Բայց չմոռանանք նաև, որ կա ամենակարող ժամանակի գործոնը։ Ժամանակի ընթացքում նայվում, վերանայվում են հաղթանակներն ու դրանք կերտողները: Փառք այն հաղթողներին, որ կարողանում են հետո էլ հաղթել ժամանակի հաղթական ընթացքին ու միշտ հաղթող մնալ:

Դուխով»:

«Պարտություն։ Ոչ ոք չի սիրում պարտվել: Ցանկացած պարտություն հետևանք է սխալ հաշվարկի, և/կամ սխալ գործողությունների, և/կամ սխալ նախնական պատերացումների: Պարտվողներին չեն ուզում նմանվել, պարտվողներին դատապարտում են:

Բայց: Բայց կա ամենազոր ժամանակի գործոնը: Ժամանակը ներողամիտ է, կարեկցող, դասեր ուսուցանող: Պարտությունից հաղթանակ ճանապարհն անցնում է սխալների պատճառները հասկանալու և դրանք չկրկնելու պարտադրանքի միջով:
Սովորենք արդեն արված սխալներից ու մտածված գործենք, որ չպարտվենք։ Դուխով»: