Սիրիահայերի համար նախատեսված դպրոցը փակ չէ, պարզապես՝ աշակերտ չունի

Ընդունելության քննությունների, բուհական համակարգի փոփոխությունների, եւ սիրահայերի դպրոցի վերաբերյալ, Fnews.am-ը զրուցեց ԿԳ փոխնախարար Մանուկ Մկրտչյանի հետ:
-Պարոն Մկրտչյան, կարծիք կա, որ այս տարի ընդունելության քննությունների թեստերն այս ավելի բարդ ու դժվար են եղել:Դուք ի՞նչ կասեք դրա հետ կապված:
-Հեքիաթներ են, թեստերն իրականում դժվար չեն եղել: Գործնականում ամեն ինչ նույնն է, ինչ անցած տարի, պարզապես թեստային առաջադրանքների տեսակ կա, որն աստիճանաբար փոխվում է, բոլոր առարկաներն էլ փոփոխվել են ժամանակի ընթացքում, այս տարի փոփոխվեց մաթեմատիկա առարկան: Կան՝ ընտրովի, կարճ պատասխանով եւ ասույթների փնջով թեստեր: Այդ երեք տեսակն էլ ընդգրկված է թեստերում:
-Օգտվելով առիթից կուզենայի ճշտել.ուսման վճարների բարձրացում սպասվո՞ւմ է, թե՞ ոչ:
-Հստակ պատասխան չեմ կարող տալ, սակայն տվյալ հարցի վերաբերյալ լուրջ խոսակցություններ չեմ լսել:
-Պարոն Մանուկյան, իսկ ի՞նչ կասեք, ոչ պետական բուհերի ճակատագրի մասին:Կարծես թե ամեն տարի ավելանում է փակվող բուհերի թիվը:
-Ոչ պետական բուհերի փակման հատուկ գործընթաց չկա: Այդ բուհերն իրենք են փակվում, քանի որ դրանք ինչ-որ իմաստով բիզնեսի գործ են, ու եթե այն իրեն չի արդարացնում՝ փակվում է:
-Իսկ նման բուհերում որակյալ կրություն ստանալը որքանո՞վ է ապահովված:
-Հենց այստեղ է, որ խնդիրներ են առաջանում: Երբ դրվում է որակյալ կրթության հարցը, երբեմն նրանք չեն կարողանում համապատասխան պայմաններ ստեղծել, կամ էլ համապատասխան քանակի ուսանողներ ունենալ: Նրանց մենք խորհուրդ ենք տվել գնալ դեպի խոշորացում:
-Ի՞նչ կասեք սիրիահայերի համար բացված դպրոցի մասին, ինչո՞ւ ներկայումս այն չի գործում:
-Մենք դպրոցը չենք փակել, այն ֆինանսավորվում էր բարերաների կողմից, իհարկե, դրա հետ մեկտեղ մեր պետությունը եւս բավական շատ ներդրումներ էր անում: Սակայն, երբ Սիրիայում դրությունը բավական բարդացավ, ծնողները որոշեցին, որ իրենց երեխաները պետք է հայկական դպրոցներ գնան: Իրենց ցանկությամբ մենք որոշեցինք, որ երեխաները գնան մեր պետական դպրոցները: Սիրիահայերի համար նախատեսված դպրոցը փակ չէ, պարզապես՝ աշակերտ չունի: Այդ դպրոցը ժամանակավոր էր, նրանք հույս ունեին, որ հետ են գնալու Սիրիա, սակայն դրությունն ավելի վատացավ եւ որոշեցին, որ նրանց երեխաները մնան այստեղ եւ տեղի ծրագրերով սովորեն: Նրանց վնաս կլինի մեր դպրոցներ չայցելելն այն առումով, որ այստեղ մնալով նրանք պետք է յուրացնեն մեր դպրոցական ծրագիրը:

Սոսե Չանդոյան