Սիրուշոն, Ավետ Բարսեղյանն ու Արամ MP3-ն Ամանորի գիշերը անականկալ կմատուցեն

Հաղորդավար, մի շարք երգերի բառերի հեղինակ Ավետ Բարսեղյանը միշտ ստեղծագործական ռիթմի մեջ է: Life.panorama.am-ը կապ հաստատեց նրա հետ՝ իմանալու, թե է՞լ ինչ նորություններ է պատրաստել իր երկրպագուների և հայ երգիչների համար: «Ամենաթարմ նորությունն այն է, որ գրել եմ «Ուրիշի փոխարեն» ֆիլմի սաունդթրեյքի բառերը: Ասեմ, որ երաժշտության հեղինակը Սիրուշոն է, կատարելու է Արամ MP3-ն: Ի դեպ, ֆիլմի պրեմիերան կկայանա նոյեմբերի 19-ի: Նորություններից մեկն էլ այն է, որ պատրաստում եմ նաև ամանորյա նոր երգ, որը կկատարեն մեր շոուբիզնեսի ներկայացուցիչները: Այն եթեր կհեռարձակվի Հայաստանի հանրային հեռուստաընկերությամբ, հավանաբար, Ամանորի գիշերը»,-հայտնեց Ավետը:

Նրանից տեղեկացանք նաև, որ նոր ստեղծագործություններ է պատրաստել Անդրեի, Արմինկայի, Էրիկի համար. «Անդրեի երգը կոչվում է «Սիրո պայքար», Արմինկայինը շնորհավորական երգ է: Եվս մեկ գործ եմ պատրաստել երգիչ Էրիկի համար, որը նվիրված է աշխարհի ամենաթանկ էակներին՝ փոքրիկ բալիկներին: Դե, իսկ Բեթիի եվրատեսիլյան՝ «Արևի մարդիկ» երգի մասին, կարծում եմ, ընթերցողը տեղեկացված է»:

Ավետ Բարսեղյանի անձնական կյանքում, ինչպես ինքն է հայտնում, մեծ փոփոխություններ չկան: Երբ նրան հիշեցրեցինք, որ նախորդ տարի Ամանորի շեմին մեզ հայտնել էր սպասվելիք նշանադրության մասին, ժպիտով պատասխանեց. «Այս տարի նման լավ նորություն չունեմ»:

Իսկ մենք լավատես ենք և Ավետին կասենք՝ ամեն դեպքում, Նոր տարին դեռ առջևում է: