Սոնա Շահգելդյան. «Ես ու ամուսինս ապրում ենք առանձին ու շատ սիրով» Original

Երգչուհի Սոնա Շահգելդյանը երեկ հայտարարել է, որ ամուսնացել է։ BlogNews.am-ը Սոնայի հետ զրուցել է գաղտնի ամուսնության, ամուսնական կյանքի և սիրելիի մասին։ Սոնայի խոսքով՝ ինքն ամուսնացել է դեռևս փետրվարի 14-ին՝ իր ծննդյան օրը։ Սիրելին իր ոլորտից չէ, զբաղվում է բիզնեսով։ «Կարևորը՝ աշխատող է»,- նշեց երգչուհին։

«Ամուսնությունից հետո միայն լավ բաներ են եղել՝ շատ ավելի երջանիկ եմ դարձել։ Կարևորը հետագա կյանքն է։ Ուրախ եմ, որ երկուսս էլ աշխատում ենք, զբաղված ենք լինում և իրար շատ կարոտում ենք»,- ասաց Սոնան։ Թեև շատերը չեն պատկերացնում Սոնային առանց մայրիկի, ըստ երգչուհու՝ ինքն ու ամուսինն առանձին են ապրում. «Ապրում ենք առանձին ու շատ սիրով»։ 

Նա նշեց, որ իր և սիրելիի որոշմամբ հարսանիք չի եղել։ «Հարսանիքի փոխարեն կարող ենք շրջագայել տարբեր երկրներով։ Կարծում եմ՝ որևէ մեկին ապացուցելու բան չունեմ»,- ասաց նա ու հավելեց, որ ամուսնությունը գրանցել են ԶԱԳՍ-ում։ «Եթե ցանկանամ, կհագնեմ հարսի շոր։ Ես շատ զույգերի եմ երջանկացրել իմ երգով, շատ հարսանիքների եմ մասնակցել։ Ինձ համար հարսանիքը և հարսի շորը կարևոր չեն, շատ ավելի գլոբալ բաներ կան կյանքում։ Շատ զույգեր կան, թեկուզ մեր շոու բիզնեսից, ովքեր հարսանիք չեն արել և շատ երջանիկ են, իսկ եկեղեցի անպայման կգնանք։ Եկեղեցի մտնելիս մարդ պետք է պատրաստ լինի, մաքուր հոգով և սրտով մտնի եկեղեցի, դա շատ կարևոր է ինձ համար։ Ամուսնությունը խաղ ու պար չէ, դա ամբողջ կյանքի համար է, որպեսզի ունենաս լավ ընտանիք, ամուսին, երեխաներ։ Ես ամեն ինչ թողնում եմ Աստծո հույսին»,- նշեց Սոնան։

Երգչուհու փոխանցմամբ՝ ինքն ու սիրելին դեռ աշխատում են և մեղրամսի կմեկնեն ավելի ուշ. «Զբաղվածության պատճառով մեղրամիսը մի քիչ ուշանում է, բայց կարող եմ ասել՝ մեզ մոտ միշտ էլ ուրախ են անցնում օրերը ու միշտ էլ մեղրամիս է։ Պարտադիր չէ գնալ մի տեղ, որ լավ լինի։ Մինչ մեղրամսի գնալը մայրիկիս հետ կգնանք Դիլիջան, իսկ հետո սիրելիիս հետ կմեկնենք շրջագայության»։

Ինչ վերաբերում է ամուսնությունն այսքան ժամանակ գաղտնի պահելուն՝ Սոնան ասաց. «Գաղտնի պահելու խնդիր չի եղել։ Շատ մարդիկ ամուսնանում են և չեն տարածում դա, ամեն մեկն ունի իր կյանքը։ Ամեն բան չէ, որ պետք է բոլորն իմանան։ Կարծում եմ՝ դա իմ անձնականն է։ Իմ երկրորդ կեսը շատ համեստ է և չի ցանկանում շատ բան հրապարակել մեր անձնականի մասին։ Ես հարգում եմ նրա կարծիքը և համամիտ եմ նրա հետ։ Դա մեր կյանքն է, մենք ենք որոշում ինչպես ապրել։ Մենք չենք հետաքրքրվում ուրիշների կյանքով, չենք էլ ուզում, որ մեր կյանքով հետաքրքրվեն»,- եզրափակեց երգչուհին։

Երգչուհու հասցեին շատ քննադատություններ են հնչում, ըստ որոնց, Սոնան իրականում ընտրյալ չունի և նրա ամուսնոււթյան լուրը հորինված է։ Այս կապակցությամբ Սոնան ասաց. «Նման բան ասողներին ասեմ, որ իրականում արդեն ամուսին ունեմ,  շատ երջանիկ ու ուրախ եմ։ Ինչո՞ւ ես չպետք է ընտրյալ ունենամ»։