2 Փետրվար, 2021

Սորոսականները գրավել են Շիրակի պետհամալսարանը

Մինչ երկիրը զբաղված էր պատերազմով և հետպատերազմյան արհավիրքներով հետաքրքիր զարգացումներ են տեղի ունեցել հանրապետության երկրորդ քաղաքի մայր բուհում` Շիրակի պետական համալսարանում:

Վերջինս «հետհեղափոխական» Հայաստանի բուհերից առաջինն է, որտեղ սորոսականները կարողացան, արդեն նախկին ԿԳՄՍ նախարար Արայիկ Հարությունյանի բացահայտ աջակցությամբ, տապալել նախկին ուսանողական խորհուրդը, վերջինիս գործունեությունը համարեցին անօրինական և ստեղծեցին իրենց ուսանողական խորհուրդը «Ռեստարտ Գյումրի» նախաձեռնության համակարգող Գևորգ Ղուկասյանի և իր թիմի ղեկավարությամբ:

Վերջինս երկար ժամանակ իբր պայքարում էր բուհի «պայծառ» ապագայի, որակյալ կրթության, արդյունավետ կառավարման համար, քննադատում էր բազմաթիվ աշխատակիցներին, պարզաբանումներ էր պահանջում արտաքին ծրագրերից հազարավոր դոլարներ ստացող աշխատակիցների գործունեության վերաբերյալ, բայց արի ու տես, որ դրանք դյուրահավատ ուսանողներին, դասախոսներին իր կողմը գրավելու ձևեր էին:

Այս երիտասարդը շատ սերտ հարաբերություններ է հաստատել ռեկտոր դառնալու երազանքով տառապող պրոռեկտորի պարտականությունները կատարող Նազելի Ավետիսյանի (ով, ըստ Գյումրիում տարածված լուրերի, 17 հազար դոլարի գրանտային ծրագիր է ստացել Սորոսի գրասենյակից) ու վերջինիս անձնական դեկան Օֆելյա Հովհաննիսյանի հետ: Հոգեբանության հեռակա բաժնի ուսանող Գևորգը և նրա թիմի ակտիվ անդամները հիմնականում Օֆելյա Հովհաննիսյանի ֆակուլտետից են և շատերը բուհում գիտեն, որ Նազելի Ավետիսյանին, Օֆելյա Հովհաննիսյանին ծառայություններ մատուցող ուսանողները, չսովորելով, կարող են հենց այնպես կարմիր դիպլոմներ ստանալ:

Իշխանության հովանավորյալ ռեկտորի պաշտոնակատար Երվանդ Սերոբյանի թիմի կարկառուն ներկայացուցիչներ Նազելի Ավետիսյանը, Օֆելյա Հովհաննիսյանը, Գևորգ Ղուկասյանի ուսանողական խորհուրդն ակտիվորեն լծվել էին վերջերս կազմակերպված հոգաբարձուների խորհրդի նոր կազմի ընտրությանը, ընդ որում, չար լեզուների պնդմամբ, Նազելի Ավետիսյանն ուսանողներին խոստացել էր իր թիմի համար անցանկալի դասախոսներին և ուսանողներին հոգաբարձուների խորհրդի կազմում չընտրելու պայմանով բուհում աշխատանքի տեղավորել կամ ուղարկել արտասահման սովորելու: Գիտությունների դոկտորը, ճանաչված մտավորականը հոգաբարձուների խորհրդի կազմում չի ընտրվում, նրա փոխարեն անցկացնում են գիտական աստիճան, կոչում չունեցող թույլ դասախոսին, որը հեշտ կառավարելի է:

Հիմա անցնենք ամենահետաքրքիր հարցին, ինչից առաջին հերթին հենց ամբողջ Գյումրին պետք է մտահոգվի: Գյումրին ուղղակիորեն վտանգված է սորոսական գործակալական ցանցի գործունեության պատճառով: Գևորգ Ղուկասյանը պատահականորեն չի հայտնվել և ակտիվացել Գյումրիում, որտեղ կա ռուսական ռազմաբազա: Բավական է ուսումնասիրել Գևորգի ֆեյսբուքյան էջը և այնտեղ կերևա այդ երիտասարդի թուլությունն ադրբեջանցիների նկատմամբ, բայց պատերազմի ժամանակ իբր զբաղված էր ռազմաճակատին սնունդ ու հագուստ հասցնելով:

Պատերազմից հետո մի պահ էլ մտածեց, որ իր սիրելի ադրբեջանցիներն այդքան էլ «լավը» չեն: Ինչ վերաբերում է բուհի ղեկավարության որոշ ներկայացուցիչներին, ապա նրանց համար կարևորը թեկուզ թուրքի օգնությամբ պաշտոն պահելն ու նոր պաշտոն ստանալն է: Օրինակ, ասում են, որ պատերազմի ժամանակ Նազելի Ավետիսյանի որդին երկրից փախչում է, այն դեպքում, երբ լուսավոր երիտասարդներն իրենց կյանքն ու առողջությունը տվեցին երկրին: Հետաքրքիր է, որ, ըստ լուրերի, Էրատո ջոկատի երկու անդամներ նույն ՇՊՀ-ից են, Օֆելյա Հովհաննիսյանի ֆակուլտետից են. մեկը դասախոս է, մյուսն՝ ուսանողուհի, երկուսն էլ Գյումրիից ու Շիրակի մարզից չեն: Նրանց հետ «անմեղ» Օֆելյա Հովհաննիսյանը շատ լավ հարաբերությունների մեջ է և Հովհաննիսյանի եղբայրն էլ զինվորական է: Ընդհանրապես, հակառուսական տարրերը Գյումրիում շատ ակտիվ են նաև ազգային կեղծ արժեքների անվան տակ, ինչը նշանակում է, որ հակառուսականությունը իշխանությունների թողտվությամբ թափ է հավաքել Գյումրիում: Իսկ ի՞նչ է անում ԱԱԾ-ն: Իհարկե, ոչինչ...