«Սպանել 15 րոպեում» ֆիլմը` մարտական տեսարաններով ու կասկադյորական բարդ հնարքներով (Թրեյլեր)

ESem.am-ը պատմել է «Սպանել 15 րոպեում» ֆիլմի մասին: Ֆիլմի պրոդյուսեր և գլխավոր դերակատար Էդուարդ Փոռեյանը մեզ հետ զրույցում հայտեց, որ սցենարը թիմային աշխատանքի արդյունք է. սցենարի հեղինակները նաև ֆիլմի հերոսներն են:

«Ինքս հանդես եմ գալիս երկու կերպարով` սկզբում հայրենիք վերադարձած մեծարարուստ, ով առաքելություն ունի կատարելու, մյուսը՝ սիրահարված, սակայն իրադարձությունների բերումով վրեժի ծարավ անձնավորություն,- իր կերպարների մասին խոսելիս ասաց Էդուարդը` ավելացնելով,- գլխավոր դերում նկարահանվել եմ ես, քանի որ ունեմ դերասանի մասնագիտություն, և առաջին անգամ չէր, որ մասնակցություն եմ ունենում ֆիլմերում: Գլխավոր դերը պահանջում էր, որպեսզի այն խաղար այնպիսի մեկը, ով կունենար մարզական տվյալներ: Դրա համար որոշվեց, որպեսզի ինքս ներկայացնեմ. ուրիշին չվստահելու խնդիր չի առաջացել»:

Ըստ Էդուարդի` «Սպանել 15 րոպեում» ֆիլմը խոհափիլիսոփայական միտք է պարունակում ու դրանով առանձնահատուկ է, ունի մարտական գրագետ տեսարաններ, կասկադյորական բարդ հնարքներ: «Ի վերջո, սա ինձ համար այն ֆիլմն է, որով հասարակությանը փորձել եմ ցույց տալ, որ յուրաքանչյուրիս կյանքը պայքար է, ուր կան բազում զգացումներ, զգացմունքներ, այդ ամենի մեջ պետք է մարդ մնալ»,- շեշտեց գլխավոր դերակատարը:

ESem.am-ը Էդուարդից հետաքրքրվեց նաև՝ արդյոք չե՞ն վախենում այս շրջանում մեծ էկրաններ բարձրացող ֆիլմերի հետ մրցակցությունից: «Իհարկե, մեծ է մրցակցությունը, սակայն վստահ ասեմ, որ մենք ունենք մեր հանդիսատեսը, ով արդեն իսկ սպասում է ֆիլմի ցուցադրությանը: Սոցցանցերի միջոցով ստանում ենք նամակներ, որոնք ոգևորվում են. պիտի ասեմ` լավատես ենք, սպասում ենք լավ արդյունքների»,- վստահեցրեց Էդուարդը: Վերջինս փոխանցեց նաև, որ հայկական կինոշուկայում այժմ գերիշխում են կոմեդիան ու մելոդրաման: «Այդ իսկ պատճառով որոշեցինք նկարահանել մարտաֆիլմ, որպեսզի այդ ժանրը նախընտրող հանդիսատեսն ու հեռուստադիտողը նույնպես ունենան դիտելու հայկական կինոարտադրության ֆիլմ»,- եզրափակեց դերասանը: