Սուտ՝ մեծ ականջներով

Մամուլում շրջանառվող տեղեկությունների համաձայն, ԱԺ ԲՀԿ խմբակցության պատգամավոր Արագած Ախոյանը, Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի հոկտեմբերի 9-ի վճռով է սնանկ է ճանաչվել: Վճիռն օրինական ուժի մեջ է մտել նույն օրը: Նույն հրապարակման համաձայն , նշվում է, որ Ախոյանը սնանկ է ճանաչվել «Ամերիա» բանկի պահանջով։ Դատարանի որոշմամբ Արագած Ախոյանի սնանկության գործով կառավարիչ է նշանակվել Արսեն Չիտչյանը: Լրագրողների հետ զրույցում Արսեն Չիտչյանն էլ նշել է, որ 1 ամսվա ընթացքում պարտատերերը պետք է իրենց պահանջները ներկայացնեն Արաբկիր և Քանաքեռ-Զեյթուն վարչական շրջանների ընդհանուր իրավասության դատարան, որից հետո պարզ կդառնա՝ պահանջները հիմնավոր են, թե ոչ։

Fnews.am-ի հետ զրույցում, պատգամավոր Արագած Ախոյանն անդրադառնալով այս հրապարակումներին, հավաստաիցրեց, որ այն չի համապատասխանում իրականությանը, եւ որ իր սնանկացման մասին լուրերը՝ մեծ ականջներով ստեր են: Ինչն առնվազն բանսարկություն  է՝  եթե ոչ ավելին:
Հարցին, թե այդ դեպքում ինչո՞ւ է այդ հրապարակումների հիմքում հղում արվում պաշտոնական կայքում տեղ գտած հայտարարությանը, Ա. Ախոյանը արձագանքեց. «Որովհետեւ վճիռն ու որոշումը իրարից չեն տարբերում: Ամբողջ հարցը հենց դրա մեջ է: Կա դատական փոքր վեճ՝որն էլ իրականում իմ հետ կապված չէ: Եթե նյութերի հետ մանրամասն ծանոթանան, կհասկանան, որ դրա մասին խոսելն անգամ անհարմար է: Էդ ամպագորգոռ հայտարարությունները հավանաբար արվում են՝ ցանկալին իրականության տեղ անցկացնելու համար: Այնինչ, կրկնում եմ այդ ամենը իրականության ոչ մի կապ չունի. անհեթեթ խոսակցություններ են, ուրիշ ոչինչ»:

Հ. Գ.Երբեմն այնպիսի տպավորություն է ստեղծվում, որ շատ հաճախ մարդիկ ուրախանում են այն հանգամանքից, որ այս կամ այլ ոլորտում կարող են խնդիրներ, կամ որոշակի կնճիռներ առաջանալ: Իսկ գուցե հարցին առավել լուրջ տեսանկյունից կարելի է մոտենալ, եւ օրինակ բարձրաձայնել նրա մասին, թե ինչո՞ւ ոչ մի կերպ չի խրախուսվում բիզնես-միջավայրի զարգացումը։ Ինչո՞ւ նպաստավոր պայմաններ չեն ստեղծվում գործարար դաշտի բարելավման, գործարարության մեջ հավասար պայմաններ ստեղծելու, ու գործարար հատվածին նույնպես աջակցելու մասին:
Առանց այն էլ,  այս մի փոքր երկրում մի բուռ գործարար է մնացել, որոնց անունները պատեհ-անպատեհ առիթներով շահարկելու փոխարեն, կարելի է խորանալ երկրի ներսում առկա սոցիալ-տնտեսական բուն խնդիրների ու դրանց լուծման տարբերակները գտնելու մեջ: Այլ ոչ թե գործարար ջիղը կոտրելով՝ փորձենք անտեսել  տնտեսական լուրջ ճեղքվածքներն ու բացթողումները, որոնց ազդակները հասնում են հասարակության գրեթե բոլոր շերտերին:

Նոնա  Ադամյան