Թե ինչի մասին է երազում Քոչարյանը...

Քաղաքական թեժ աշնան եւ ներքաղաքական դաշտում սպասվող զարգացումների շուրջ, Fnews.am-ը զրուցեց ԱԺ պատգամավոր Ալիկ Արզումանյանի հետ.
-Պարոն Արզումանյան, վերջերս շատ են խոսում քաղաքական թեժ աշնան մասին, ի՞նչ եք կարծում ինչպիսի՞ն կլինի այն:

-Ես իմ կյանքի վերջին 22 տարիներին մշտապես լսել եմ, որ քաղաքական թեժ աշուն է լինելու: Դա կարծես <մանտրա> լինի, որը ցանկացած ընդդիմություն մշտապես կրկնում է: Եղել են թեժ աշուններ եւ ոչ այդքան, թե հիմա որքանով է այս անգամ իրականանալու այդ սպառնալիք ասենք, թե խոստում ասենք, ժամանակը ցույց կտա: Բայց թեժ աշուն ունենալու համար անհրաժեշտ են ակտիվ գործողություններ:

-Իսկ թեժ աշուն ունենալու համար քաղաքական ինչպիսի՞ վիճակ պետք է լինի եւ արդյո՞ք մենք ներկայումս գտնվում ենք այդ վիճակում:

-Պետք է հստակ տարանջատում լինի ընդդիմության եւ իշխանության միջեւ, մենք պետք է հասկանանք ով է ներկայացնում ընդդիմությունն ու իշխանությունը: Այդ առումով ինչ-որ լղոզվածություն կա, եւ մոտեցումները ճշգրտվում են: Մինչեւ չլինի հստակ տարանջատում, հասարակության համար էլ դժվար կլինի հասկանալու, թե ով է լինելու իրենց առաջնորդը: Որպեսզի կարողանաս ունենալ հասարակության լայն աջակցությունը, պետք է նաեւ հասարակությանը հստակ ծրագրեր ներկայացնես եւ թիմ ունենաս: Այս պարագայում բացակայում են թե՛ մեկը եւ թե՛ մյուսը: Չկա հստակ այլընտրանքային ծրագիր եւ չկա այլընտրանքային թիմ:
-Իսկ այս պահի դրությամբ քաղաքական ո՞ր ուժին կարելի է ընդդիմություն համարել:

-Ես չէի ցանկանա գնահատական տալ. պարզապես ասացի, որ լղոզվածություն կա ընդդիմադիր դաշտում եւ խոսքը գնում է ոչ իշխանական ուժերի մասին: Նորից կասեմ, որ հստակ տարանջատում պետք է լինի իշխանության եւ ընդդիմության միջեւ եւ հենց այդ լղոզվածությունն է, որ առաջացած հարցերին պատասխաններ չեն տրվում:
-Քաղաքական դաշտում լուրջ փոփոխություններ կլինե՞ն, թե՞ ոչ: Արդյո՞ք Ռոբերտ Քոչարյանի վերջին հարցազրույցից կարելի է ենթադրել, որ նա հաշվարկներ ունի` ապագայի հետ կապված:
-Պարոն Քոչարյանն ինչպես եւ յուրաքանչյուր քաղաքացի, իրավունք ունի հանդես գալու հարցազրույցներով եւ արտահայտել իր տեսակետը:Հուսով եմ, որ հայ հասարակությունը չի մոռացել նրա կառավարման անօրինությունները, հանցագործությունները եւ կարծում եմ, որ իր վերադարձի որեւէ պահանջարկ չկա: Իսկ թե ինչի մասին է նա երազում, դա իր անձնական խնդիրն է:

Սոսե  Չանդոյան