Թերթը հերքում գլխավոր դատախազ Գևորգ Կոստանյանի մասին հրապարակած լուրը

«Իրատես de facto»-ի «Ասում են...» խորագրի ներքո հրապարակվող տեղեկությունները չնայած ընտրվում-վերցվում են տվյալ շաբաթ քաղաքական շրջանակներում ու սոցցանցերում (մասնավորապես Facebook-ում) շրջանառվող խոսակցությունների ու լուրերի բանահյուսական հարուստ «բոխչայից», բայց հիմքում միշտ ճշմարտության անկյունաքարն ունեն:

Ճշմարտության հենց այդ «հատիկին» էլ հավատալով ու վստահելով նախորդ թիվ 50-րդ համարում հրապարակեցինք (նաև որոշակի աղբյուրից ճշտած) այն լուրը, թե ՀՀ գլխավոր դատախազ Գևորգ Կոստանյանին պատկանող «Էլիտ կապիտալ» ընկերությունն է շահել բանակին ձու և միս մատակարարելու տենդերը:

Անչափ մեծ էր խմբագրության զարմանքը, երբ լուրը հրապարակվելուց հետո մեր իսկ աղբյուրը փոխանցեց, որ թյուրիմացություն է տեղի ունեցել, հիմա գլխավոր դատախազը ոչ մի առնչություն չունի տվյալ ընկերության հետ»,–գրում է թերթը և շարունակում. «Իրողություններին ու փաստերին նախանձախնդրորեն վերաբերվելու իրատեսական մեր դիրքորոշմանը հավատարիմ հայցում ենք պարոն Կոստանյանի ներողամտությունը և ամառային հանգստից հետո նրան հրավիրում բովանդակալից հարցազրույցի»։