«Թեղուտի» նախաձեռնությունը կոչ է անում ԱՄՆ-ին եւ Մեծ Բիրտանիային միջամտել

Թեղուտի պաշտպանության քաղաքացիական նախաձեռնությունը բաց նամակ է հղել ԱՄՆ եւ Մեծ Բրիտանիայի արտաքին գերատեսչությունների ղեկավարներին՝ ՀՀ-ում այդ երկրների դիվանագիտական ներկայացուցիչների կողմից հանքարդյունաբերական մասնավոր գործընթացներին միջամտությունները դադարեցնելու եւ նրանց գործողությունների օրինականությունը հետաքննելու կոչով: Քաղաքացիական նախաձեռնությունը հայտարարություն է տարածել, որով կոչ է անում ԱՄՆ պետքարտուղար Ջոն Քերիին եւ Մեծ Բրիտանիայի արտաքին գործերի մշտական փոխքարտուղար ու դիվանագիտական ծառայության ղեկավար Սայմոն Ֆրեյզերին հղված նամակում նշված են դեսպանների կողմից դիվանագիտական նորմերին եւ էթիկայի կանոններին հակասող կոնկրետ դեպքերը, ոսկու հանք շահագործելու մտադրություններ ունեցող «Լիդիան Ինթերնեշընըլ» ընկերության հանքարդյունաբերական ծրագրի հակասությունները ազգային օրենսդրությանը եւ դրա բնապահպանական ու սոցիալական վտանգները: Նախաձեռնությունը ընդգծել է, որ 2013 թվականի հուլիսի 18-ին կառավարության 1787-Ն որոշուման հավելվածով հաստատել է «Սեւանա լճի ջրհանք ավազանի տարածքային հատակագծման նախագիծը», որով, ըստ էության, վերջ է դրվում Ամուլսարի շահագործման պրոյեկտին, քանի որ Ամուլսարի գրեթե ողջ տարածքն ընդգրկվում է Սեւանա լճի անմիջական ազդեցության գոտում: Համաձայն նշված հավելվածի՝ «Սեւանա լճի վրա անմիջական ազդեցության գոտին սկսվում է կենտրոնական գոտու արտաքին սահմանից եւ ձգվում է մինչեւ Սեւանա լիճը շրջափակող լեռնաշղթաների ջրբաժանը, ընդգրկում է նաեւ ավազանի մաս կազմող Արփա եւ Որոտան գետերի վերին հոսանքների ջրհավաք ավազանները, Որոտան-Սեւան հիդրոտեխնիկական համալիրի երկայնքով եւ թունելի առանցքից 3000-ական մետր լայնությամբ շերտագիծը, Կեչուտ եւ Սպանդարյան ջրամբարներն իրենց ջրհավաքներով: Ամիջական ազդեցության գոտում ցանկացած գործունեություն ուղղակի կամ անուղղակի ճանապարհով ազդում է Սեւանա լճի, նրա մեջ թափվող գետերի հիդրոֆիզիկական, հիդրոքիմիական, հ հիդրոկենսաբանական, սանիտարաթունաբանական, հիգիենիկ եւ այլ որակական ու քանակական ցուցանիշների վրա»: Ըստ հայտարարության հեղինակների՝ իրավական տեսանկյունից խիստ խոցելի եւ հանրային դժգոհության լայն ալիք բարձրացրած նախագծին ԱՄՆ եւ Մեծ Բրիտանիայի պաշտոնական ներկայացուցչության կողմից ցուցաբերվող աջակցությունը բացասական հետագիծ է թողնում այդ երկրների կողմից հռչակված՝ ժողովրդավարության, իրավունքի գերակայության, կոռուպցիայի դեմ պայքարի սկզբունքներին եւ նպատակներին: