Տիգրան Կարապետիչը հույսը դեռ չի կտրել

Քաղաքական վերջին զարգացումները լուրջ մտահոգության առիթ են տալիս: Իրենց ընդդիմադիր համարող քաղաքական քառյակն այլեւս վերածվել է եռյակի, եւ կարծես թե այդ գործընթացը լուրջ հարցականների տեղիք է տվել հասարակական ու քաղաքական շրջանակներում:
Արդյո՞ք ոչ իշխանականները կարդարացնեն իրենց առաջ դրված ծրագրերը, կհամարվե՞ն նրանք իրական ընդդիմություն, թե՞ ոչ, այս եւ այլ հարցերի շուրջ Fnews.am-ը զրուցեց Ժողովրդական կուսակցության նախագահ Տիգրան Կարապետյանի հետ.

-Պարոն Կարապետյան, ինչպիսի՞ գնահատական կտաք քաղաքական քառյակի, ավելի ճիշտ`արդեն եռյակի գործունեությանը:

-Ես իրենց ընդհանրապես ընդդիմադիր չեմ համարում, ու դուք էլ երեւի նման կերպ եք մտածում: Դա ուժ է, որը մրցակցում է իշխանության հետ: Դա նախկին իշխանությունն է, հարուստ օլիգարխներ են, այդ ուժն իշխանության թեւերից մեկն է:

-Ուզում եք ասել, որ սա պարզապես հերթական քաղաքական բեմականացում է՞:

-Այո, կարելի է այդպես ասել. իրենք իրենց սեփական հարցերն են առաջ քաշում, հենց դրա համար էլ դաշնակները նրանց հետ չեն: Նրանք ինչ-որ բան են ուզում. պաշտոն, դիրք, զիջումներ իրենց, բայց ոչ ժողովրդի հանդեպ: Եթե նրանք պահանջող էին, թող էլեկտրաէներգիան չթանկանար, թող դրա պահանջը դնեին: Նրանք պարզապես քաղաքական ճնշումներ են իրար վրա գործադրում՝ դիրքերը լավացնելու համար:

-Իսկ նախկին քառյակի կողմից ժամանակ առ ժամանակ ինչ-որ կետեր առաջ քաշելու հետ կապված ի՞նչ կասեք:

-Այդ պահանջներն էլ ենք տեսել, 15 օրից կհեռանան, դա էլ ենք լսել, դա լրիվ թատրոն է:

-ՀՅԴ-ի քառյակից հեռանալու քայլը շատերը դավաճանություն են համարում: Իսկ դո՞ւք:
-Դե դաշնակները միշտ էլ դավաճան են եղել էլի, ի՞նչ , դա նորություն է՞:

-Իսկ հոկտեմբերի տասի հանրահավաքը ըստ Ձեզ մարդաշատ կլինի՞:

-Մարդաշատ կլինի, որովհետեւ այդ ուժերը փողատեր են, ուժերը կողմանկիցներ ունեն նույն իշխանական շրջանից, պարզապես, որ ժողովուրդը պոռթկում չունի, դառնում է՝ քավության նոխազ:

-Այսօրվա դրությամբ ընդդիմադիր ուժ ու՞մ եք համարում:

-Ընդդիմադիր ուժերն այն ուժերն են, որոնք ոչ թե մրցակցում են իշխանության հետ, այլ հետեւյալ կերպ են վարվում: Օրինակ՝ իշխանությունն ունի ազատամարտիկներ միություն, մյուս թեւն էլ է ստեղծում կառույց, որտեղ ներգրավված են ազատամարտիկներ:Մեկն ունի երիտասարդների թեւ, մյուսն էլ է ստեղծում: Իսկ իրական ընդդիմությունը՝ ժողովրդական ուժերն են, օրինակ՝ Ժիրայր Սեֆիլյանի եւ մյուսների պես, որոնք ոչ մի պահանջ չունեն` բացի ժողովրդի վիճակի բարելավումը եւ իշխանության հետ չմերվելը:

-Դուք չե՞ք պատրաստվում այլեւս ակտիվ կերպով գործել քաղաքական դաշտում:

-Ես քաղաքականությունից չեմ հեռացել, պարզապես սպասում եմ, որ լինի ժողովրդի պոռթկումը:

-Մինչ պոռթկում լինելը, որոշ առաջնորդներ չե՞ն ցանկանում քայլեր անել:

-Շատ ենք քայլեր արել, իսկ հիմա ակնկալում ենք, որ ժողովրդի կողմից պոռթկում լինի: Ժողովուրդն օրերից մի օր անպայման ոտքի է կանգնելու:

Սոսե  Չանդոյան