Տիտանիկի վրա բոլորն էլ առողջ էին...

Հաշված րոպեներ են մնացել 2016 թվականի գալուն, 2015-ը արդեն կազմ-պատրաստ կանգնած է հեռանալու և պատմության մեջ իր տեղը գրավելու համար։ Թե ինչպիսին էր 2015 տարին և ինչ տեղ կգրավի պատմության մեջ, ամեն մեկը կորոշի իր համար։ Իսկ ինչպիսի՞ն էր 2015-ը «Ազգային արժեքների պաշտպանման ճակատ» ՀԿ-ի համար։

2015-ը մեզ բերեց ինչպես նվաճումներ, այնպես էլ անկումներ։ 2015-ը հարթ չէր, սակայն մենք միասին կարողացանք հաղթահարել բազմաթիվ ներքին ու արտաքին խոչընդոտներ ու անցած տարվա համեմատ «Ազգային արժեքների պաշտպանման ճակատ» ՀԿ -ն 2016 թվական է մտնում անդամների եռապատկված քանակով։ Շա՞տ է, թե՞ քիչ, որոշեք ինքներդ՝ հաշվի առնելով, որ սա ընդամենը երկրորդ Ամանորն է, որը տոնում է մեր կազմակերպությունը։ Ընդհանուր առմամբ տարին լավն էր, իրականացվեցին մի քանի խոշոր փոփոխություններ և ծրագրեր, որոնցից ամենակարևորը ղեկավարման կազմ զգալի փոփոխության ենթարկվեց։ Կազմակերպության ավանդական հանդիպումներին ավելացան Հայաստանի տարբեր վայրերի բնության գրկում անցկացված գիշերօթիկ հանդիպումները։ Ավելին, 2015-ին նույնիսկ մի քանի միջազգային հանդիպում կազմակերպվեց,որին մասնակցեցին մեր մի շարք անդամներ։Չնայած վերևում նշվածի վրա բավական ժամանակ ու էներգիա է ծախսվել, այս ամենը թվում է մի մեծ մանրուք մեր կազմակերպությունում կատարված մեկ իրադարձության հետ համեմատելիս։ 2015 թվականին երկու «ես» մեր կազմակերպության շնորհիվ գտան իրար ու միանալով դարձան` մեկ ընդհանուր մենք։Հարկ ենք համարում նշել, որ մեր անդամների նախաձեռնությամբ սկսվեց իրականացվել բարեգործական ծրագիր, ինչը շատ ուրախալի ու ողջունելի էր մեր կողմից։ Հույս ունենք, այս ծրագիրը 2016-ում էլ կշարունակվի։ Հարգելի հայրենակիցներ շնորհավորում եմ բոլորիդ Ամանորն ու Սուրբ Ծնունդը: Թող 2016 թվականը ձեզ բոլորիդ սեր և ուրախություն բերի: Ցանկանում եմ առողջություն, երջանկություն և, որ ամենակարևորն է` հաջողություն, որովհետև ինչպես ասել է Չերչիլը` Տիտանիկի վրա բոլորն էլ առողջ էին:

Սեւան Աղաջանյան