Թրաֆիքինգի գործով դատապարտվեց 11,5 տարվա ազատազրկման

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով՝ սեռական շահագործման նպատակով կանանց թրաֆիքինգի մեջ մեղադրվող Հերիքնազ Խաչատրյանը դատապարտվեց 11,5 տարվա ազատազրկման:

Դատավճռով` տուժող ճանաչված Ա. Բ.-ին թրաֆիքինգի ենթարկելու վերաբերյալ դրվագով` ՀՀ քրեական օրենսգրքի 132-րդ հոդվածի 3-րդ մասի 1-ին կետով, Հերիքնազ Խաչատրյանը ճանաչվեց անմեղ՝ վերջինս մասնակցությունը ապացուցված չլինելու պատճառով:

Որպես պատժի սկիզբ կհաշվվի 2014թ. հունիսի 22-ից:

Նշենք, որ այսօր՝ մինչև դատավճռի հրապարակումը, ամբաստանյալը հանդես եկավ վերջին խոսքով և դատարանին խնդրեց «ճիշտ վճիռ կայացնել»՝ հավելելով՝ «սա իմ հոդվածը չէ»:

Հիշեցնենք, որ մեղադրող դատախազ Արմեն Մարուխյանը, մեղադրական ճառով հանդես գալով, միջնորդել էր Հերիքնազ Խաչատրյանին դատապարտել 13 տարվա ազատազրկման:

Ըստ մեղադրանքի՝ Հերիքնազ Խաչատրյանը, բնակվելով Արաբական Միացյալ Էմիրությունների Դուբայ քաղաքում, ինչպես նաև Նելլի Ներսիսյանի ղեկավարությամբ զբաղվելով մարմնավաճառությամբ, միավորվելով վերջինիս և Հայաստանում բնակվող իր ավագ քրոջ՝ Բավական Խաչատրյանի հետ, անդամագրվել է մարդկանց շահագործման նպատակով ստեղծված կազմակերպված խմբին, որի ղեկավարը եղել է Նելլի Ներսիսյանը:

Նրանք, իրենց հանցավոր մտադրությունն իրագործելու նպատակով, կատարել են համապատասխան դերաբաշխում. ըստ այդմ՝ Նելլի Ներսիսյանը, ղեկավարելով հանցավոր խմբի գործողությունները, անձամբ կազմակերպել է հավաքագրված անձանց մուտքի հրավեր ստանալը, կատարել նրանց Դուբայ տեղափոխելու հետ կապված ծախսերը, իսկ Հերիքնազ և Բավական Խաչատրյանները կատարել են կանանց հավաքագրման և Դուբայ տեղափոխելուն, փոխանցելուն, թաքցնելուն ուղղված գործողություններ:
մանրամասները՝pastinfo.am-ում: