Թուրքիան Սիրիային խնդրել է հարգել իր տարածքային ամբողջականությունը

Սիրիայի Ժողովրդական խորհուրդը նոյեմբերի 29-ին տարածված հայտարարության մեջ Թուրքիայում գտնվող Իսքենդերուն քաղաքը (նախկինում Ալեքսանդրետայի սանջակ) անվանել է սիրիական հողի անբաժանելի մաս և խոստացել «վերադարձնել գողացված հողն իր օրինական տերերին», հաղորդում է սիրիական պետական ​​SANA գործակալությունը:

Սիրիայի Ժողովրդական խորհուրդը նաև հայտարարել է, որ Թուրքիան մեծ դեր է խաղացել վարձկանների և ահաբեկիչների կողմից սիրիական հողերի վրա հարձակվելու և սիրիական տարածքների օկուպացման գործում:

Ընդգծվել է, որ Թուրքիան կոպտորեն խախտում է մարդու իրավունքների և միջազգային ու մարդասիրական օրենքների հիմնարար կանոններն ու սկզբունքները։

Այս կապակցությամբ պաշտոնական Անկարան հայտարարություն է տարածել` խնդրելով հարգել «Թուրքիայի տարածքային ամբողջականությունը»:

«Մենք կտրականապես մերժում ենք լկտի և անօրինական հայտարարությունը՝ ուղղված մեր երկրի տարածքային ամբողջականությանը», - հայտարարել է Թուրքիայի ԱԳՆ-ն՝ Սիրիայի Ժողովրդական խորհուրդն անվանելով «զուրկ ժողովրդավարական լեգիտիմությունից»:

«Նման հայտարարությունները նաև ռեժիմի ցնորական անելանելիության նախանշաններ են, որը տարիներ շարունակ ճնշում է սեփական ժողովրդին, պատասխանատու է հարյուր հազարավոր անմեղ մարդկանց մահվան և միլիոնավոր մարդկանց իրենց հողերից ու տներից տեղահանելու համար»։

Հիշեցնենք, որ ավելի վաղ Սիրիայի նախագահ Բաշար Ասադը պահանջել էր Թուրքիայից դուրս հանել զորքերը Սիրիայի տարածքից։

«Թուրքիան պետք է անհապաղ դուրս բերի իր զորքերը Սիրիայի հյուսիսային տարածքներից և դադարեցնի Սիրիայի տարածաշրջանի օկուպացիան: Միջազգային հանրությունն իր հերթին պետք է աջակցի Սիրիայի ջանքերին՝ երկրի հյուսիսում Թուրքիայի կողմից օկուպացված տարածքները ազատագրելու ուղղությամբ», - հայտարարել էր Ասադը։