Տղամարդիկ կանացի կդառնան Հովիկ Աբրահամյանի հոգածությամբ

Ֆոլաթթվի ազդեցության արդյունքում կարող է տղամարդկանց  ֆեմինիզացում տեղի ունենալ: Խնդիրն այն է, որ ֆոլաթթուն ակտիվացնում է էստրոգենները, եւ դրա օգտագործման հետեւանքով տղամարդկանց մոտ կարող են ի հայտ գալ կանացի հատկանիշներ: Այս մասին այսօր լրագրողների հետ հանդիպմանը խոսել է «Հանուն առողջության» նախաձեռնության անդամ Աշոտ Կարապետյանը: 

«Սպառողների ազգային ասոցիացիայի» նախագահ Մելիտա Հակոբյանն էլ նշել է, թե ՀՀ կառավարության՝ ալյուրի արհեստական հարստացման մասին օրինագծով խախտվում է սպառողների՝ ընտրության եւ անվտանգության իրավունքները: Հակոբյանը նույնիսկ նկատել է, թե համոզված չէ, որ պաշտոնյաներն՝ իրենք կօգտագործեն այդ հարստացված հացը: «Նրանք ավելի շուտ օրգանիկ հաց կուտեն»,-ասել է ապառողների շահերի պաշտպանը: 

Հիշեցնենք, որ Հովիկ  Աբրահամյանի կառավարությունը օրենքի նախագիծ է մշակել՝ Հայաստանում արտադրվող  ալյուրը որոշ հավելանյութերով (ֆոլաթթու, երկաթ, վիտամին A) հարստացնելու մասին: Սա պատճառաբանվում է Հայաստանում երեխաների 37 տոկոսի մոտ հայտնաբերվող սակավարյունության դեպքերով, որոնք պայմանավորված են, իբր, արյան մեջ ֆոլաթթվի, երկաթի պակասությամբ: 

«Սպառողների ազգային ակադեմիայի» փոխնախագահ Ռուբեն Հայթյանը նշել է, թե կառավարությունը պատճառաբանում է, սակայն չի ապացուցում, թե իսկապես ինչի հետեւանք է երեխաների սակավարյունությունը: Իսկ Մելիտա Հակոբյանը նկատել է, թե Հայաստանը հարուստ է միրգ-բանջարեղենով, որը օգտագործելով հնարավոր է խուսափել շատ հիվանդություններից: 

Կարելին՝ կարելի է, բայց միրգ-բանջարեղեն գնելու համար բնակչությունը միջոցներ պետք է ունենա: Հայտնի է, որ Հայաստանում բարձր տոկոս է կազմում գործազրկությունը, շատ են մահացության դեպքերը ՝ տարածված մի շարք հիվանդությունների պատճառով: Իսկ ի՞նչ կարող է անել կառավարությունը իր ժողովրդի համար, եթե ոչ՝ մտածել  այդ ժողովրդի ձեռքը կարթ տալու եւ ոչ թե նեխած ձուկ սաղացնելու մասին: 

Մեր երկիրն իսկապես մրգառատ է: Այլ հարց է, որ այդ բարիքներից օգտվելու փող չունի հասարակության  մի զգալի հատված: Հովիկ Աբրահամյանը տնտեսությունը ոտքի կանգնեցնելու փոխարեն, ստացվում է, որ  հիմա  էլ  ֆոլաթթվով է ուզում կերակրել հանրությանը՝ ժողովրդի հերը վերջնականապես անիծելու համար: 

Հայաստանը աշխարհում այն երկրներից է, որոնք ունեն ցածր ծնելիություն: Եթե նկատի ունենանք, որ կառավարության՝ այս նախագծի արդյունքում մի քանի տարի հետո կունենանք, այսպես ասած,  հորմոնափոխ տղամարդիկ, ապա կարելի է  պատկերացնել, թե ինչի կարող է հանգեցնել ժողովրդի դարդերով օրը 24 ժամ «տապակվող» կառավարության գործունեությունը:

Աղբյուրը ` azatamart.am