Տղաները պետք է հասկանան, որ նման կերպ շարունակել չի կարելի.Գառնիկ Իսագուլյան

«Առաջին իսկ օրը շատերը լծվել են այն գործին, որ ամեն ինչ անեն՝ նոր զոհեր, արյուն չունենալու համար»,- այսօր լրագրողների հետ հանդիպման ժամանակ ասաց «Ազգային անվտանգություն» կուսակցության ղեկավար, ՀՀ-ում ԼՂՀ մշտական ներկայացուցչության խորհրդական-խորհրդատու Գառնիկ Իսագուլյանը՝ խոսելով «Սասնա ծռեր» խմբի հետ տեղի ունեցող բանակցային պրոցեսի մասին:

Նա նշեց, որ Արցախի հերոս, ԼՂՀ Ազգային ժողովի պատգամավոր Վիտալի Բալասանյանն անձամբ է ցանկություն հայտնել միջնորդ դառնալ ՀՀ ուժային կառույցների և այդ տղաների միջև: Գ. Իսագուլյանի փոխանցմամբ՝ այս ընթացքում Վիտալի Բալասանյանը, բնականաբար, հանդիպել է նաև Ժիրայր Սէֆիլյանին, փորձել են ինչ-որ խնդիրներ համաձայնեցնել:

Նախնական հստակ պայմանավորվածություն կար, որ զենքով որևէ մարդ չպետք է տեսախցիկների մոտ երևա, որ լրատվամիջոցները որոշակի գծից այն կողմ չպետք է անցնեն: Ցավոք սրտի, այդ պայմանավորվածությունը տղաների կողմից չպահվեց»,- նշեց Գ. Իսագուլյանը:

Անդրադառնալով ԱՍԱԼԱ-ի մարտիկ, «Հիմնադիր խորհրդարանի» անդամ Ալեք Ենիգոմշյանի այն հայտարարությանը, թե Վիտալի Բալասանյանը կոնտեքստից հանում է Ժիրայր Սէֆիլյանի խոսքը և սուտ է ասում, Գ. Իսագուլյանը նկատեց, որ ի տարբերություն շատերի՝ Վիտալի Բալասանյանը զինվորական մարդ է, «երբեք խոսքը հենց այնպես չի հասկանում, հասկանում է ուղիղ՝ ինչ ասվել է»:

Որևէ մեկը չի փոխարինելու Վիտալի Բալասանյանին, նա որևէ պայման չի խախտել, դրա համար որևէ փոփոխության անհրաժեշտություն չկա: Ես չեմ ասում՝ Ենիգոմշյանը սուտ է ասում, բայց գուցե նրան գցել են թյուրիմացության մեջ: Այդ առաջարկությունը ոչ թե պետք է միտինգում անել, այլ կոնկրետ մարդու հետ պայմանավորվել: Նրանց կողմից շատ կոպիտ թյուրիմացություն է եղել, որը մենք կարող ենք բնութագրել՝ որպես սուտ, բայց չենք ուզում իրավիճակը լարել»,- հայտարարեց Գ. Իսագուլյանը: