Ուշադրություն վարորդներին. ի՞նչ անել, եթե չեք պահպանել տուգանքի վճարման կտրոնը

Երբեմն վարորդները տուգանքի վճարում կատարում են, բայց վճարումը հաստատող կտրոնը չեն պահպանում. որոշ ժամանակ անց էլ ԴԱՀԿ ծառայությունից ստանում են նամակ, որ տուգանքի վճարումը չի կատարվել:

Ապացուցելու համար, որ վճարումը իսկապես կատարվել է փաստաբան Աշխեն Դաշյանն առաջարկում է երկու տարբերակ:

Նախ, ըստ փաստաբանի, անհրաժեշտ է բանկ դիմել, եթե վճարումը հենց բանկում է կատարվել. «Վարորդը գոնե պետք է հիշի այն բանկը, որտեղ վճարումը կատարել է: Պետք է դիմի բանկ, բանկից ստանա համապատասխան վերծանումները. Դրանք  բանկի կողմից տրամադրվող փաստաթղթեր են, որոնք կարող են հանդիսանալ վճարման հիմք՝ տուգանքը վճարելու ապացույց»:

Մյուս դեպքում, եթե վճարումը տերմինալով է կատարել, պետք է դիմել տերմինալը սպասարկող համապատասխան ՍՊԸ.  ընկերությունը կտա տեղեկանք վճարումների վերաբերյալ, և դա կօգտագործվի որպես տուգանքի վճարման  ապացույց :

Աշխեն Դաշյանը փաստում է, որ այս խնդիրը շատ տարածված է,  բայց ուրախալի է նաև այն փաստը, որ այսօր վարորդներն ավելի հետևողական են դարձել նման դեպքերում՝ կտրոնները պահում են:

Կտրոնների առկայության դեպքում վարորդները միանշանակ հասնում են հաջողության, քանի որ կազմվում է համապասասխան փաստաթուղթ, բողոքարկվում է ԴԱՀԿ ծառայությունից ստացած նամակն ու խնդիրը հարթվում է:

Զառա Մանուչարյան

Իրավաբան.net