Ուղարկված կանայք էին․ Ալիկ Սարգսյանը պարզաբանում է՝ ինչու վարչապետը փախավ Արտաշատից

«Վարչապետի մասնակցությամբ քարոզարշավը Արտաշատում շատ լավ է անցել: Ես կարծում եմ, որ ոչ մի արտառոց բան տեղի չի ունեցել: Ինչ վերաբերում է միջադեպին, ապա ուղարկված կանայք բոլոր ժամանակներում էլ եղել են՝ անկախ ամեն ինչից»,- «Առաջին լրատվական»-ի հետ զրույցում ասաց ՀՀԿ Արարատի կառույցի պատասխանատու Ալիկ Սարգսյանը:

Նշենք, որ երեկ Արտաշատում քարոզարշավի ժամանակ նախ՝ վարչապետին քաղաքապետ Արգամ Աբրահամյանը չի դիմավորել, բացի այդ, հանդիպման վերջում երկու կանայք սկանդալ են սարքել և սկսել հրապարակում վարչապետի ու իշխանությունների հասցեին հայտարարություններ անել, աղմուկ բարձրացնել՝ նշելով, որ Արտաշատում ՀՀԿ-ն ձայն չի հավաքելու:«Ճառեր եք կարդում, հեքիաթ եք կարդում, կընտրեն, բա չեն ընտրի՞ ձեզ, այ ոչխարնե՛ր»,- ավելի ուշ, արդեն վարչապետի շարասյունի հետևից վանկարկել է մի կին:

«Այդ միջադեպը լուրջ բան չէր և ոչ մի բան չէր նշանակում: Ինչ վերաբերում է նրան, թե ինչու քաղաքապետը չի դիմավորել վարչապետին, ապա դա երևի իրենից պետք է հարցնեք, բայց քաղաքապետը նույնպես պատգամավորության թեկնածու է առաջադրվել և քարոզարշավների մեջ է հիմա, ինչպես մենք: Ձեզ կհորդորեմ այդքան չսևեռվել ուղարկված կանանց վրա, ովքեր սկսեցին գոռգոռալ նկարահանվելու համար, երբ վարչապետն արդեն հեռացել էր: Այդպիսի կանանց պակաս ոչ մի տեղ և ոչ մի ժամանակում չի եղել: Վարչապետին ժողովուրդը շատ լավ դիմավորել է, ճանապարհել է, մեծ բազմություն կար: Պետք չի չեղած բանից մեծ աղմուկ բարձրացնել»,-ասաց Սարգսյանը:

մանրամասն՝այստեղ: