Ուղղակի չի կարելի գնալ միայն պոպուլիստական եւ ոչ ժողովրդահաճո քայլերով

Forums.am–ի  զրուցակիցն  է  ՀՀ   աշխատանքի եւ սոցիալական հարցերի նախարար Արտեմ  Ասատրյանը.

 -Պարոն Ասատրյան,  Ձեր կարծիքով  բյուջեով նախատեսված գումարներով հնարավոր կլինի լուծել ոսոցիալական խնդիրների մեծ մասը, ի՞նչ ուղղությամբ են ծախսվելու բյուջեի գումարները:

-Ավելացումները,  որոնք տեղի են ունեցել 2014թվականի բյուջեի նախագծով սոցիալական պաշտպանության ոլորտին շուրջ 57 կիլարդ դրամի կարգի է: Դրա մեծ մասն  ուղղված է կենսաթոշակների, աշխատավարձերի եւ ծննդյան միանվագ նպաստի բարձրացմանը: Մնացած ծրագրերը շարունակական բնույթ են կրում` մասնավորապես ավանդի փոխահատուցուման եւ մնացած  սոցիալական պաշտպանության ոլորտի ծրագրերը: Նոր բյուջեյով նախատեսվում է աշխատավարձերի շուրջ քառասուն տոկոսով ավելացում, կենսաթոշակների շուրջ տասնհինգ տոկոսով միջին ավելացում:

-Եվ  ի՞նչ  ենք ունենում այդ ամենի արդյունքում.  Արդյո՞ք դրանով իսկ նվազելու են արտագաղթի տեմպերն ու  այն բազում սոցիալական  խնդիրներն ու հոգսերը,  որոնք որ այսօր առկա են…

-Այն թիրախները, որոնք նշեցի, որպես սոցիալական պաշտպանության ոլորտի ծրագրերի թիրախներ`դրանք հենց ուղղված են աղքատության հաղթահարման խնդիրների լուծմանը, աշխատավարձերի բարձրացմանը, ինչն  առավելապես կնպաստի աշխատող աղքատ կատեգորիայի դուրս բերմանը, կամ նվազեցմանը: Կենսաթոշակների բարձրացումը եւս ուղղված է առավելապես ցածր կենսաթոշակ ստացողների թոշակների չափերի բարձրացմանը, որի արդյունքում մեր հաշվարկներով շուրջ երեսուն հազար կենսաթոշակառուներ ծայրահեղ աղքատության գծից ավելի բարձր թոշակ են ստանալու: Մենք ներկայումս մշակում ենք ազգային ծրագիր, ԱԺ-ի կողմից հավանության արժանացած ծրագիր է, որը շուտով նաեւ միջգերատեսչական հանձնաժողովի նիստի շրջանակներում կքննարկվի եւ ներկայացվի հանրությանը:

-Պարոն Ասատրայան կենասթոշակառուները բողոքում են պարտադիր կուտակային համակարգից, Դուք դրան ինչպե՞ս եք վերաբերում:

-Դա նրանից է, որ մեզ մոտ անձը երիտասարդ տարիքում իր ծերության մասին չի մտածում: Հետեւաբար ստեղծվում են համակարգեր, որոնք թույլ կտան ավելի բարձր կենսամակարդակ ապահովվել ծերության տարիքում: Այլ երկրներում նմանատիպ համակարգերը` արդեն վաղուց մշակույթի ուժով են դարձել պարտադիր, որովհետեւ շուրջ հարյուր-երկու հարյուր տարի գործում են այդ համակարգերը: Իսկ մեր երկրում նոր է ներդրվում բազմաաստիճան կենսաթոշակային համակարգ, որը չորս բաղկացուցիչներից է բաղկացած լինելուց: Այսինքն նվազագույն սոցիալական երաշխիքները, որը պետությունը ստանձնում է,  եւ շարունակելու է պահպանել զրո եւ առաջին բաղադրիչի շրջանակներում` հստակ թիրախավորելով դրանց չափերը: Եվ միայն երկրորդ եւ երրորդ  բաղադրիչներն են վերաբերում կուտակային համակարգերին` մի դեպքում՝ պարտադիր, մյուս դեպքում՝ կամավոր: Այս քառաստիճան համակարգը հնարավուրություն է տալու ապահովել համակարգերի  ֆինանսական կայունությունը եւ ավելի բարձր կենսաթոշակներ ապահովել գյուղացիներին: Եթե նայեք ժողովրդագրական տենդենցները` առաջիկա  5-10 տարիներին, ապա կտեսնենք, որ  բավականին մեծ թիվ են կազմելու կենսաթոշակի տարիքի անցնող անձիք: Չտեսնել եւ չփորձել լուծել այդ խնդիրները` նույնիսկ եթե դրանց լուծումները  համարվում են ոչ ժողովրդահաճո, ուղղակի չի կարելի, չի կարող կառավարությունը գնալ միայն պոպուլիստական կամ ժողովրդահաճո քայլերով, այդ դեպքում մեր երկրի խնդիրները կմնան այդպես էլ չլուծված:

-Այսինքն,  ՀՀ  կառավարությունը խորապես հավատում է  իր ասածներին ու իր վարած քաղաքականությանը…

-Այո, իհարկե:

-Դե դրա համար էլ այս օրին ենք…

-Ամեն ինչ այնպես չէ, ինչպես որ ներկայացնում են:

 Նոնա  Ադամյան