Վ. ՍՈՒՐԵՆՅԱՆՑ - 160 ՀԱՅ ՊԱՏՄԱՆԿԱՐՉՈՒԹՅԱՆ ՀԻՄՆԱԴԻՐԸ

Այս տարի լրացավ գեղանկարիչ, գրաֆիկ, գրքային նկարազարդող, քանդակագործ, ճարտարապետ, թարգմանիչ, արվեստի տեսաբան Վարդգես Սուրենյանցի ծննդյան 160-ամյակը (մարտի 10-ին): Այս առիթով Հայաստանի Ազգային պատկերասրահը լույս է ընծայել մեծանուն արվեստագետին նվիրված գիտական աշխատություն: Վարդգես Սուրենյանցն իրավամբ համարվում է պատմանկարչության հիմնադիրը հայկական կերպարվեստում: Նրա երկերում ներդաշնակ կերպով միահյուսվել են արեւմտյան եւ արեւելյան ավանդույթները, եւ, այնուամենայնիվ, նրա արվեստը նախեւառաջ սնվում էր ազգային ակունքներից:Ախալցխայում ծնված, Մոսկվայում, ապա Մյունխենի գեղարվեստի ակադեմիայում կրթություն ստացած նկարիչը տիրապետում էր օտար լեզուների, զբաղվում էր եվրոպական հեղինակների գրական ստեղծագործությունների եւ գիտական աշխատությունների թարգմանությամբ: Նրա ստեղծագործությունների ամենամեծ հավաքածուն այժմ պահվում է Հայաստանի Ազգային պատկերասրահում` շուրջ 290 գեղանկարչական եւ գրաֆիկական աշխատանք: Վարդգես Սուրենյանցի հոբելյանին նվիրված այս աշխատությունը նրա գեղարվեստական ժառանգությունը դիտարկում է նորովի:

Գրքի հեղինակներն են արվեստաբաններ Վիկտորիա Բադալյանը եւ Հայկուհի Սահակյանը, որոնք աշխատելով Ազգային պատկերասրահում, թանգարանի նկարիչ-վերականգնողների հետ ուսումնասիրել են Սուրենյանցի աշխատանքների թվագրումը, տեխնիկան, որի արդյունքում ստացված նորահայտ տվյալներն ընդգրկված են այս հրատարակությունում: 

ՆՈՒՆԵ ԶԱՔԱՐՅԱՆ

IRAVUNK TV