Վահագն Չախալյանին և Տիգրան Չոբանյանին մեղադրանք է առաջադրվել.pastinfo.am

Վահագն Չախալյանին և Տիգրան Չոբանյանին մեղադրանք է առաջադրվել՝ ՀՀ քրեական օրենսգրքի 34-219-րդ հոդվածի 2-րդ մասի 1-ին կետի հատկանիշներով, այն է՝ մի խումբ անձանց կողմից նախնական համաձայնությամբ շենքեր, շինություններ, տրանսպորտի, հաղորդակցության կամ կապի միջոցներ զավթելու փորձը: Այս մասին «Փաստինֆո»-ի հետ զրույցում ասաց փաստաբան Միքայել Շխիմյանը։

Ավելի վաղ տեղեկացրել ենք, որ հունվարի 28-ին Փաշինյանի հրաժարականի պահանջով հայահավաք է իրականացվել, որի ընթացքում 21 անձ բերման է ենթարկվել ՀՀ քրեական օրենսգրքի 219֊րդ հոդվածի հատկանիշներով՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելու կամ դրանք պահելու կասկածանքով։ Նույն հոդվածի հատկանիշներով հարուցվել է քրեական գործ, որի շրջանակներում հինգ անձ ձերբակալվել է։ Քրեական գործով ձերբակալված անձինք են Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը։

Վահագն Չախալյանի և Տիգրան Չոբանյանի փաստաբան Միքայել Շխիմյանը մեզ հետ զրույցում նշեց, որ իր պաշտպանյալներն այս փուլում ցուցմունք չեն տվել ոչ կասկածյալի կարգավիճակում, ոչ էլ՝ մեղադրյալի, սակայն իրենց անհամաձայնությունն են հայտնել մեղադրանքի վերաբերյալ՝ նշելով, որ մեղադրանքն անհասկանալի է, առաջադրված մեղադրանքը չեն ընդունում։ Ձերբակալության հիմքում դրվել է այն հանգամանքը, որ վերջիններս բերման են ենթարկվել անմիջապես հանցանքը կատարելու դեպքում, մասնավորապես, վարույթն իրականացնող մարմինը Չոբանյանին ձերբակալել է՝ նոր արարք կատարելը կանխելու, իսկ Չախալյանի դեպքում՝ փախուստը կանխելու հիմքով, սակայն վերջինս բերման չի ենթարկվել տեղում, կանգնած է եղել բոլորովին այլ վայրում, փախչելու միտում չի ունեցել։ Նույնը նաև Չոբանյանի դեպքում է, թեև որպես հիմք չի նշվել փախուստի ռիսկը, տեսանյութեր էլ կան, որ վերջինս հայտնել է, որ իրեն բերման չեն ենթարկել, սակայն ինքն ինքնակամ ցանկանում է գնալ և պարզաբանում տալ։ Փաստաբանը հայտնեց, որ ձերբակալման որոշումների դեմ բողոքներ է ներկայացվել՝ վիճարկելով հիմնավոր կասկածի առկայության, հիմքերի և նպատակների մասով։

«Իրենց նկարագրած արարքը փաստացի համահունչ չէ իրականում տեղի ունեցածի հետ, այսինքն՝ շենք-շինություններ զավթելու կասկածանքով են իրենց ձերբակալել, բայց արձանագրության մեջ տարօրինակ բաներ է գրված, որն ընդհանրապես կապ չունի այս հանցակազմի հետ»,- նշեց Շխիմյանը։