Վանաձորում հարձակվել են Արթուր Սաքունցի 15-ամյա որդու վրա

Վանաձորում ապրիլի 26-ին հարձակվել են իրավապաշտպան Արթուր Սաքունցի 15-ամյա որդու՝ Միքայել Սաքունցի վրա: Այս մասին NEWS.am-ի հետ զրույցում ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:

«Միջադեպը տեղի է ունեցել «12 աթոռ» սրճարանում: «Քաղաքացիական պայմանագիր» կուսակցության անդամներ ներկայացող մի քանի անհայտ երիտասարդներ վիրավորել են Միքայելին, որից հետո միջադեպ է  սկսվել։  Հանդիպման ներկաները, սակայն, միջամտել են և կանխել ծեծը»,- պատմեց Արթուր Սաքունցը:

Արթուր Սաքունցի խոսքով` միջադեպը կապված է նրա հետ, որ վերջին օրերին Վանաձորում տեղի ունեցող ելույթները էականորեն տարբերվում էին մայրաքաղաքի ելույթներից, շարժմանը առաջին օրվանից միացած երիտասարդներն էլ այդ օրը հանդիպման են հրավիրել ՔՊ-ի Վանաձորի ներկայացուցիչ Արամ Խաչատրյանին, որպեսզի ճշտեն իրենց հետագա անելիքները:

«ՔՊ-ի Վանաձորի ներկայացուցիչ Արամ Խաչատրյանը գնում է սրճարան, որի հետևից սրճարան են մտնում նաև ինչ-որ անծանոթ տղաներ և ներկայանում որպես ՔՊ գրասենյակի անդամներ։ Այն պահին, երբ երիտասարդները փորձել են Արամին ներկայացնել իրենց օրակարգը,  այդ տղաներից մեկը, իմանալով, որ Միքայել իմ որդին է, սկսում է միջամտել, թե՝ դու ով ես, այ տղա, դու պատրա՞ստ ես Բաքվի համար կյանքդ տալ։Միքայելն էլ ձեռքի գիրքը նետում է նրանց վրա, որից հետո վիճաբանություն է  սկսվում, և այդ ինքնակոչ ՔՊ-ականները հարձակվում են երեխայի վրա, որպեսզի ծեծեն նրան։ Սակայն հանդիպմանը ներկա մյուս երիտասարդները, «Լուսավոր Հայաստան» կուսակցության երիտասարդները պաշտպանում են Միքայելին և փորձում հարթել միջադեպը»,-ասաց Սաքունցը։

Ի դեպ, ականատեսը մեզ պատմեց, որ այդ տղաները վիրավորել են ոչ միայն Միքայել Սաքունցին, այլև շարժման մնացած ակտիվ մասսային՝ նրանց անվանելով ոչ ավանդական սեռական կողմնորոշում ունեցողներ միայն նրա համար, որ երիտասարդ աղջիկներից մեկի մազերը կարմիր են, կամ մյուսները տարբերվում են իրենց հագուկապով։

Նշենք, որ երեկվա հանրահավաքին արդեն Երևանի հարթակից Նիկոլ Փաշինյանը խոսեց Վանաձորի միջադեպի դրանք համարելով անթույլատրելի։

news.am