Վանաձորում կրքերը եռում են

Ըստ մամուլում շրջանառվող լուրերի` ՀՀԿ ավագանում Վանաձորի քաղաքապետի թեկնածուներից մի քանիսը՝ «Լոռի-Ջրմուղկոյուղի» ՓԲԸ տնօրեն Հարություն Անտոնյանը՝ Արաբկիր նախկին թաղապետ Հրայր Անտոնյանի եղբայրը, Լոռու գազի գրասենյակի տնօրեն Վարդան Բաղդասարյանը՝ ԱԺ ՀՀԿ խմբակցության ղեկավար Վահրամ Բաղդասարյանի եղբայրը, ամեն ջանք գործադրել են ամենաբարձր մակարդակից «դաբրո ստանալու» համար: Սակայն վերջնական ընտրությունը կանգնել է նոտար Մամիկոն Ասլանյանի վրա, քանի որ նրա թեկնածությունը պաշտպանել է ԱԺ պատգամավոր Կարեն Կարապետյանը:

Fnews.am-ի հետ զրույցում Մամիկոն Ասլանյանը նախ վրդովվեց` նշելով, թե տեղյակ չէ հրապարակման մասին: «Ես ի՞նչ է, պետք է պարզաբանե՞մ ուրիշի հրապարկումներները»,- ասաց Մամիկոն Ասլանյանը, ապա ավելի մեղմ տոնով շարունակեց,- «Բնականաբար ճիշտ է, իհարկե ճիշտ է… Կարեն Կարապետյան ՀՀԿ գործադիր մարմնի անդամ է, բնականաբար պաշտպանել է, իհարկե…»,-ասաց նա: Ճշտող հարցին պաշտպանե՞լ է, թե՞ միջնորդել` Մամիկոն Ասլանյանը դարձյալ վրդովվեց. «Կուսակցական բաների մեջ ….. քաղաքական գործընթացներ են դրանք, ի՞նչ միջնորդ… պաշտպանելը ուրիշ է, ի՞նչ միջնորդ… Ես էդ տերմիններով չգիտեմ ինչ պատասխանեմ… Հանրապետական կուսակցությունն ինձ առաջադրել է, որպեսզի ցուցակը ես գլխավորեմ առաջին համարում, ուրիշ ես ի՞նչ ասեմ …. Կուսակցության որոշումը պարզաբանե՞մ ... ասե՛ք»,- Fnews.am-ին հարցադրմամբ դիմեց նոտարը` չմանրամասնելով, թե ինչո՞ւ է Կարեն Կարապետյանը պաշտպանել իր թեկնածությունը:

Ինչ վերաբերում է քաղաքապետի աշխատանքին, ապա Մամիկոն Ասլանյանը գիտակցում է, որ իրեն` որպես հավանական քաղաքապետի, դժվար աշխատանք է սպասում, սակայն դա նրան չի ընկճում: «Բարդ է, թե հեշտ, պետք է արվի էդ գործն ու առաջ գնացվի… իհարկե բարդ է, միշտ էլ բարդ է, հեշտ բան չկա… Պետք է կամք, վճռականություն և գործելու պատրաստակամությունն»,-ընդգծեց Մամիկոն Ասլանյանը: