Վարչապետի դիրքերը խարխլված են. օլիգարխիայի կառավարությունը երբեք ինքն իր դեմ չի գործի

Հայաստանում կոռուպցիոն ռիսկերի նվազեցման, մենաշնորհների դեմ պայքարի և ուռճացված պետական ապարատի կրճատման մասին վաղուց են խոսում: Սակայն, ինչպես ասում են` ճառ ասող կա, զանգ կախող` չկա: Ավելին` որքան շատ են խոսում, այնքան այս խնդիրներն ավելի են հասունանում և արմատավորվում: Ու, թեև հայտարարվել է, որ նախարարություններում «Գոտիների ձգման օպերացիան» արդեն իսկ մեկնարկել է, սակայն օրինակ քաղաքական վերլուծաբան Ստյոպա Սաֆարյանը վստահ է, որ սա հերթական հայտարարությունն է և որևէ լուրջ սպասումներ ունեալն` անիմաստ է:

Fnews.am-ի հետ զրույցում նա նկատեց, որ օլիգարխիայի կառավարությունը երբեք ինքն իր դեմ չի գործի: Քաղաքական վերլուծաբանը չի ժխտում` կառավարման ապարատն ուռճացված է. նախարարներն ունեն անհասկանալի թվով փոխնախարարներ, խորհրդատուներ, օգնականներ ու օգնականների օգնականներ, բայց նրանց կրճատման մասին հայտարարությունը, Ստյոպա Սաֆարյանի որակմամբ, գովազդ է հիշեցնում: «Ի՞նչ կարիք կա հայտարարել, եթե դա անելու ես: Արա և հայտարարիր, որ անիմաստ ծախսերը կրճատել ես, անիմաստ հաստիքները կրճատել ես… առանց ավելորդ գովազդի»,- նկատում է Սաֆարյանը: Նա հարկ է համարում նկատել, որ Հայաստանը Եվրամիության կողմից մոնիթորինգի տակ է: Ու քանի որ ԵՄ-ից կա նաև ֆինանսական կախվածությւոն, ուստի վարչապետը հասկանում է, որ զեկույցներ են պատրաստվելու և գնահատավելու են, թե անցյալ տարվա համեմատ ի՞նչ առաջընթաց ենք արձանագրել` կոռուպցիայի դեմ պայքարի, տնտեսության դիվերսֆիկացման և այլ առումներով: 

Ստյոպա Սաֆարյանը նկատում է. ակնհայտ դարձավ, որ երկրի հարստությունները պատկանում են մի խումբ մարդկանց, բայց երկրի, հայրենիքի պաշտպանությունը` ժողովրդի, հատկապես նրա աղքատ խավի պարտականությունն է: «Հասարակությունը, ամենատարբեր ակցիաների միջոցով կամ ուղղակի բարեգործությամբ, իր վրա է վերցրել պետության գործառույթները: Ու վարչապետը գիտակցելով իր դիրքերի խարխլվածությունը, որպես կառավարության գլխավոր մենեջեր, փաստացի փորձում է հույսեր ներարկել, որ ինքը պայքարում է»,-ասում է քաղաքագետն ու կրկնում` օլիգարխիայի կառավարությունը երբեք ինքը իր դեմ չի գործի: