Վարչապետի որդու շքեղ Mercedes-ն ու «գործի տակ» քշվող մեքենաները

Վերջին տարիներին մայրաքաղաքի տարբեր հատվածներում, առավելապես Փոքր կենտրոնի բանուկ փողոցներում, ամեն օր կարելի է հանդիպել կայանած թանկարժեք մեքենաների, որոնք կա՛մ տրվում են վարձով, կա՛մ վաճառվում են: Սա բիզնես է, որը հատկապես զարգացել ու բարգավաճել է վերջին 2-3 տարում: Մեր տեղեկություններով՝ այս բիզնեսում ներգրավված են մի քանի հոգի, որոնցից ամենաազդեցիկն ու խոշորը վարչապետ Հովիկ Աբրահամյանի որդին է՝ Արգամ Աբրահամյանը: «Բիզնես չունեցող» վարչապետը, իրականում, թեպետ անձամբ «որեւէ բիզնես չունի եւ բիզնեսի հետ էլ կապ չունի», զբաղված է միայն տնտեսության հարցերով, սակայն շատ ժամանակակից ու էլիտար բիզնեսմեն որդի ունի, ով էլ, հավանաբար, իր բիզնես եկամուտներով հոգում է «չոր աշխատավարձի հույսին մնացած» վարչապետի համեստ ընտանիքի ոչ պակաս «համեստ» ծախսերը:

Նկատենք, որ լուսանկարում պատկերված մեքենաները մշտապես կայանում են Ամիրյան փողոցի վրա՝ «National» հյուրանոցի դիմաց, որը եւս պատկանում է վարչապետի որդի Արգամին: Այսպիսի մեքենաներ կարելի է հանդիպել նաեւ Մաշտոցի պողոտայում, Աբովյան եւ կենտրոնական այլ փողոցներում: Նշենք, որ ավտովարձույթի եւ վաճառքի համար ցուցադրված այս մեքենաները հիմնականում եւ բացարձակապես բարձր դասի թանկարժեք մեքենաներ են՝ գեղեցիկ համարանիշներով: Օրինակ՝ Ամիրյանի վրա կայանված այս մեքենաները, որոնք են՝ Bentley Continental GT coupe եւ Continental Flying Spur sedan, Infiniti QX 56, Mercedes Gelandewagen, Mercedes S-Class W221, միջինը 100.000 դոլար եւ ավելի արժեն՝ կախված տարեթվից եւ շահագործման ժամկետից: Արգամը, փաստորեն, իր հյուրանոցի հյուրերի ու տվյալ շենքում տեղակայված այլ կազմակերպությունների այցելուների համար նախատեսված ավտոկայանատեղին օգտագործում է սեփական մեքենաները գովազդելու համար:

Այստեղ, սակայն, կարեւոր է մեկ այլ հանգամանք, որ օրենքն արգելում է ավտոմեքենաների վաճառքը՝ որտեղ պատահի: Դրանց համար կան օրենքով նախատեսված հատուկ տարածքներ, ավտոշուկաներ: Հետաքրքիր է՝ օրենքի այս խախտման մասին կառավարությունում, օրինակ, տեղյա՞կ են, կամ այս բիզնեսի համար հարկ վճարո՞ւմ են բիզնեսի տերերը, այդ թվում՝ Արգամ Աբրահամյանը: Երեւանի քաղաքապետարանի աշխատակազմի առեւտրի եւ սպասարկումների վարչությունից հաստատեցին, որ ավտոմեքենաների վաճառք կարելի է իրականացնել միայն առեւտրի օբյեկտներում (ավտոմեքենաների վաճառքով զբաղվող առեւտրի օբյեկտներ) եւ առեւտրի իրականացման վայրերում (ավտոշուկաներ, ցուցահանդես-վաճառքներ), օրենքով սահմանված կարգով, իսկ ավտոմեքենաների վարձույթով զբաղվող տնտեսվարող սուբյեկտները պետք է տեղեկացնեն իրենց տնտեսական գործունեության վերաբերյալ:

մանրամասները` hraparak.am-ում: