Վարդենիսի քաղաքապետը հերքում է, Խաչիկ Ասրյանը...

Մամուլում շրջանառվող լուրերի համաձայն` օրերս Վարդենիսի քաղաքապետին իր աշխատասենյակում ծեծի են ենթարկել: Աղբյուրը մասնավորապես անդրադարձել է 3 միջադեպի` ըստ որոնց քաղաքապետին մի դեպքում քաշքշել ու խփել են «Հայոց արծիվ» կուսակցության Վարդենիսի կառույցի ներկայացուցիչներ` Արամ և Արմեն եղբայրները, մյուս դեպքում` քաղաքապետի տեղակալ Աշոտ Դավթյանը` (քանի որ քաղաքապետը ցանկացել է նրան հեռացնել աշխատանքից), իսկ երրոդ դեպքը` կապված է քաղաքապետի քարտուղարուհու որդու հետ: «Բոլորը սուտ տվյալներ են ազիզ ջան… բանսարկուները ինչ ասես սարքում են, ազիզ ջան»,-Fnews.am-ի հետ զրույցում պարզաբանելով լուրերը` ասաց քաղաքապետ Վոլոդյա Խլոյանը: Ի պատասխան հարցին, թե ինչո՞վ է պայմանավորված այն, որ իր անվան շուրջ նման խոսակցություններ են պտտվում, և ո՞ւմ է հարկավոր «հորինել» դրանք, (հատկապես, որ շատ դեպքերում «առանց կրակ ծուխ չի լինում» Վոլոդյա Խլոյանը ասաց. «Չեմ իմանում… հիմա ես կնունքի նստած եմ… է՛լ տեղակալի հետ, է՛լ ջրակարգի համակարգի հետ… է՛լ ինչ ասես չեն խոսում, ազիզի ջան, լրիվ սուտ ա»,-ասաց քաղաքապետը:

Անդրադառնալով տեղակալի հետ կապված պատմությանը, նա նշեց, որ Աշոտ Դավթյանին աշխատանքից ազատելու որոշում չունի. «Ես մտադրություններ ունեցել եմ, բայց չեմ ասել, իսկ եթե հիմա ունենամ՝ կասեմ:Ես չեմ վախենում, աղջիկ ջան»,-ասաց Խլոյանը: Նկատառմանը, որ «Հայոց արծիվների» հետ բախման պատճառը Վոլոդյա Խլոյանի բողոքն է եղել «Հայոց արծիվներ» -ի ղեկավար Խաչիկ Ասրյանին այն մասին, թե եղբայրներն իր օգտին «չեն աշխատել», քաղաքապետը նշեց. «Դա էլ է սուտ է, ընդհանրապես նրանց հետ հանդիպում, կամ խոսակցություն չի եղել… ընդհանրապես իրականության հետ կապ չունի, բանսարկություն է, հասկանում եք չէ՞ ինձ, ես ճիշտ եմ ասում…»:
Վոլոդյա Խլոյանը հերքեց նաև մամլում շրջանառվող լուրեը, ըստ որոնց, իր քարտուղարուհու` Սոնիկի որդին իր իսկ աշխատասենյակում ապտակել է իրեն, քանի որ քաղաքապետը չի կատարել իր նախընտրական խոստումը: «Նախ քարտուղարուհի Սոնիկ չունեմ, իմ քարտուղարուհին Սաթիկն ա, հիմա աշխատում ա, կարող եք զանգել իրեն… Սաթիկի տղան խելոք, ինստիտուտավարտ տղա է, քաղաքապետարան էլ ընդհանրապես չի գալիս, մեռնեմ ջանիդ…»,- ընդգծեց քաղաքապետը: Հարցին, թե գուցե վարդենիսցիները Ձեզ այնքան էլ չե՞ն սիրում, որ նման խոսակցություններ են շրջանառվում, քաղաքապետը պատասխանեց. «Եթե ժողովուրդը ինձ չսիրեր, ո՞նց կընտրեր… ովքեր որ ինձ ընդդիմադիր են եղել, իրենք են բանսարկու, տրաքում են էլի…»,-ասաց Վոլոդյա Խլոյանը` հավելելով, որ չի ցանկանում անուններ տալ. «Ես որևէ մեկի անունը չեմ ուզում տամ, ի՞նչ գործ ունեմ… իմ ժողովուրդը ինձ ընտրել ա, իմ ժողովրդի ցավը տանեմ, ես էլ պարտավոր եմ անմնացորդ ծառայել իմ ժողովրդին»:

Ի դեպ, Fnews.am-ը կապ հաստատեց նաև քաղաքապետի քարտուղարուհու` Սաթենիկ Սահակյանի հետ: Լսելով իր տղայի հետ կապված լուրը նա ծիծաղեց: «Այ ասում եք, ծիծաղս գալիս է, (ծիծաղում է): Գիտե՞ք տղաս ինչքան է հարգում քաղաքապետին… Իմ տղան՝ կիրթ, խելացի և հավասարակշռված մարդ է, նա չէր կարող նման բան անել: Նա շատ է հարգում քաղաքապետին»,-ասաց Սաթնիկ Սահակյանը: Ինչ վերաբերվում է շրջանառվող մյուս լուրերին, ապա նա դրանք ևս հերքեց: «Անհարմար է նման սուտ լուրեր տարածել, իսկ գնացե՞լ են այդ լուրերի հետքով, պետք է գնան տեսնեն` ճի՞շտ են դրանք, թե՞ չէ, հետո նոր հրապարակեն դրանց մասին… Դուք ասում եք` ես իմանում են այդ մասին… չի եղել նման բան»,-ընդգծեց քարտուղարուհին: «Հայոց արծիվների» ղեկավար Խաչիկ Ասրյանն էլ, դեպքի հետ կապված, զարմանալիորեն իր պարզաբանումներում ավելի լակոնիկ գտնվեց: (սովորաբար նա սիրում է մանրակրկտորեն խոսել ցանկացած թեմայի շուրջ ): «Տենց բան չի եղել, ես հիմա զբաղված եմ, զանգեք իրանցից ճշտեք»,-ասաց և անջատեց խոսափողը:

Ա. Սահակյան