Վարձակալն ինչպե՞ս կարող է քանդել այն շենքը, որն իրեն չի պատկանում

Այսօր Առնո Բաբաջանյանի անվան ֆիլհարմոնիայի դահլիճում տեղի ունեցավ Հանրային խորհրդի մշակույթի ենթահանձնաժողովի նիստը, որի օրակարգում էր “Զվարթնոց” օդանավակայանի հին ուղևորային համալիրի «Կլոր շենք»-ի պահպանման հարցը: Ճարտարպետ Արթուր Թարխանյանի դուստրը` Անահիտ Թարխանյանը լրագրողների և հանձնաժողովի անդամներին դատին ներկայացրեց պայմանագիր, որը կնքվել է 2001 թվականին և որի շրջանակներում շենքի վարձակալությունը հանձնվել է «Կորպորասիոն Ամերիկա» ընկերությանը: «Սույն ընկերությունը 30 տարով վարձակալում և պարտավորվում է այն պատշաճ ձևով օգտագործել: Միայն օդանավակայանի նոր շենքն է պատկանում “Կորպորասիոն Ամերիկա”-ին: Ես Կառավարությանն առաջարկեցի նոր վարձակալ գտնել, քանի որ Հայաստանը փոքր ավիացիայի կարիք ունի և սա հրաշալի հնարավորություն է տալիս մեր երկրին այն ունենալու համար: Սա եկամուտ կբերի նաեւ այն կազմակերպությանը, որը տվյալ դեպքում այդ շենքի վարձակալը կհանդիսանա», -ասաց բանախոսը, եւ նկատեց. «Բայց հարցի դրական կողմերի հետ մեկտեղ, այստեղ բազմաթիվ հարցեր են ծագում բուն պայմանագրի հետ կապված: Զարմանալի է, թե վարձակալն ինչպես կարող է քանդել այն շենքը, որն իրեն չի պատկանում»:

Ռումբը պայթելու դեպքում էլ շենքները կանգուն կմնան

Խոսելով շենքի սեյսմիկ անվտանգության մասին տիկին Թարխանյանը նշեց նաեւ. «Շենքը, ստրատեգիկ օբյեկտ է, այնպես, ինչպես օրինակ Ատոմակայանը: Իսկ սա նշանակում է, որ ռումբը պայթելու դեպքում էլ շենքերը կանգուն կմնան: Ինձ համար շատ զարմանալի է այս եզրակացությունները, որոնց մեջ սեյսմիկ վտանգի առկայությունն ակնհայտ է: Բարբարոսաբար քանդվել ու աղավաղվել են մույթերի երեսպատումները, որոնք կապ չունեն շենքի անվտանգության հետ: Թող ձևավորվի սեյսմիկ հանձնաժողով և այն որոշի, թե ինչն ինչոց է: Ժամանակին շենքը պահպանվող հուշարձանների ցուցակում էր, բայց չգիտեմ թե ինչու ու երբ հանվեց այդ ցուցակից: Ես առաջարկում եմ քաղաքացիական նախաձեռնության հանձնաժողով ստեղծել և գտնել նվիրյալ մի մարդու, ով կդառնա այս շենքի վարձակալը: Ես վստահեցնում եմ, որ նրանք կարճ ժամանակում գումարները ետ կբերեն, շենքն էլ իր նախկին տեսքը կստանա: Ի դեպ, շենքը գնահատվել է 100 միլիոն դոլար, սա իհարկե, ամենահամեստ հաշվարկներով»:

ՀՀ Մշակույթի ենթահանձնաժողովի անդամ Հովհաննես Թադևոսյանի կարծիքով էլ շենքը մեզ համար մեծ նշանակություն ունի և նման կառույց կորցնելը մենք չենք կարող թույլ տալ. «Բոլորիս համար դա հպարտանալու առիթ էր, եւ ես կցանկանամ, որ այն գործի ու պահպանվի»-նկատեց Թադեւոսյանը:

Հայաստանյան իրականության մեջ  եթե մի փոքր  էքսկուրս կատարենք առ օլիգարխիան  եւ «քանդեմ-թափեմ»  մի շարք այլ «ընկերությունների  կողմից իրականացված «ավերածությունների»  շարքում, ապա, եւս մեկ անգամ կգանք այն համոզմանը, որ  ամեն ինչ մեկ շրջապտույտի մեջ է տեղավորվում:  «Ծածկած շուկան», իսկը մեզ վառ  օրինակ. ինչ էր այն ու ինչ դարձավ…

Զառա ՂԱԶԱՐՅԱՆ