Վաղը հնարավորություն կունենաք գնել էկոլոգիապես մաքուր գյուղմթերք

Ս.թ. նոյեմբերի 8-ին՝ ժամը 10:00-ից մինչև 16:00-ը, Մաշտոցի պողոտային հարող գյուղատնտեսական տոնավաճառում («Մալիբու» սրճարանի հարևանությամբ) կգործի գյուղմթերքների ցուցահանդես-վաճառք՝ նվիրված Գյուղի կանանց միջազգային օրվան:

Ցուցահանդես-վաճառքն իրականացնելու է «Հայ կանայք հանուն առողջության և առողջ շրջակա միջավայրի» հասարակական կազմակերպությունը ՀՀ գյուղատնտեսության նախարարության աջակցությամբ՝ «Սոլակ համայնքի կանայք` հանուն առողջ պտղի ողջ տարվա ընթացքում» ծրագրի շրջանակում: Գնորդը հնարավորություն կունենա անմիջապես արտադրողից գնել ագրոքիմիկատների հնարավորինս պակաս օգտագործմամբ աճեցրած գյուղմթերքներ:

Միջոցառմանը, որն իրականացվելու է Երևանի միջազգային կանանց ասոցիացիայի (IWAY) աջակցությամբ, իրենց մասնակցությունն են բերելու ՀՀ գյուղատնտեսության նախարարության, Ֆրանսիայի Ռհոն Ալպ շրջանի ղեկավար մարմինների, ինչպես նաև այլ միջազգային և հասարակական կազմակերպությունների ներկայացուցիչներ:

ՄԱԿ-ը հոկտեմբերի 15-ը հռչակել է «Գյուղի կանանց միջազգային օր»` ի նշան գյուղի և գյուղատնտեսության զարգացման գործում կանանց դերի և մասնակցության կարևորության: Ըստ փաստացի տվյալների, աշխարհում մոտ 1,6 մլրդ կին ներգրավված է գյուղատնտեսական աշխատանքներում: Արտադրվող գյուղմթերքների կեսից ավելին աճեցվում է կին ֆերմերների տքնաջան աշխատանքի շնորհիվ: Ողջ աշխարհում կին ֆերմերներին է պատկանում մշակելի հողատարածքների միայն 2 տոկոսը: Նրանք օգտվում են գյուղատնտեսական վարկերի 1 տոկոսից: