Վեց տարի անց երկու դերասանների կյանք խլած պատահարը չի բացահայտվել VIDEO

Վերջերս կայքերից մեկում տպագրվել էր ուղիղ 6 տարի առաջ ավտովթարի հետևանքով կյանքից հեռացած «Որոգայթ» սերիալից սիրված դերակատար Գեղամ Խանդիլյանի քրոջ` Դիանա Խանդիլյանի նամակ-բացահայտումը: 

Խորհրդավոր ավտովթար, սուտ խոսակցություններ և ասեկոսեներ… Aysor.am-ը այդ և այլ հարցերի շուրջ զրուցել է Դիանա Խանդիլյանի հետ:

-Դիանա, արդեն 6 տարի է անցել Ձեր եղբոր` Գեղամ Խանդիլյանի մահից: Կարողանո՞ւմ եք հաշտվել կորստի հետ:

-Իհարկե ոչ, եթե ողջ հայության համար էր ցավ, պատկերացրեք, թե մեզ համար ինչ ցավ է: Նա էր մեր տան միակ սյունը, որդին և եղբայրը: Չնայաց այն բանին, որ Գեղամը չկա, մեր կողքին չէ, բայց մեզ համար նա կա, ամեն պահի մտածում ենք, որ հիմա կմտնի տուն կամ կզանգի: Նրա բոլոր անձնական իրերը, հագուստները տանն են, նրա օծանելիքի բույրը դեռ բուրում է: Գեղամը մեզ հետ է…

-Վերջերս կայքերից մեկին ուղարկված նամակով ակնարկեցիք, որ ողբերգական այդ վթարը այնքան էլ պատահականության արդյունք չէր: Ճի՞շտ եմ հասկացել:

-Կայքերից մեկում, այո, նշվում է, չնայած` ես չեմ ցանկացել անդրադառնալ ինչ-որ բացահայտումների. կայքն է դա վերնագրել որպես բացահայտում… Ես միայն ցանկացել եմ նշել, որ հարկավոր է Գեղամի և Արամի ծննդյան և մահվան օրերին գոնե հիշել, հիշատակել նրանց մասին, թեկուզ համառոտ ներկայացնել: Ակնարկել եմ «Շանթ» հեռուստաընկերության և մեր Հայաստանի անտարբերությունը այսպիսի պահերին:

-Ըստ տեղեկությունների` Գեղամը ղեկին է եղել գինովցած վիճակում: Սխա՞լ է մեր ինֆորմացիան:

- Գեղամը ղեկին է եղել, բայց մեքենան մյուս ուղևորինը` Էդգարինն էր: Եղբայրս ուրիշի մեքենա երբեք չէր վարում, չգիտեմ` ինչ պետք է լիներ, որ ստիպված վարեր: Գինովցա՞ծ: Ոչ այդքան, դա չափազանցված է: Երբ ես գնացի այդ բոլոր հետքերով, իմացան` ով եմ և ինչի համար եմ հետաքրքրվում, բոլորն էլ պատմեցին եղելությունը. Երևանից գնալիս նրանք կանգ են առել մի ռեստորանի մոտ, այնտեղ հաց են կերել, խմել են միայն հյուրասիրված կոնյակ: Մենք վճարման թուղթը տեսել ենք...իսկ վերադարձին կանգ են առել բենզալցակայանում: Երբ իրենցից հետաքրքրվեցինք, չէին ցանկանում հարցերի պատասխանել: Միայն մի երիտասարդ ասաց, որ ինքը Գեղամին ու Արամին շատ էր սիրում, այդ օրն էլ աշխատել է: Իր խոսքերով` երեքն էլ նորմալ, արթուն ու հանգիստ են եղել, լցրել են բենզինն ու հանգիստ շարժվել Երևանի ուղղությամբ… Այսպիսի շատ ու շատ փաստեր կան, որոնք չեն համապատասխանում քերգործում գրված պատմությանը: Այդպես էլ այդ գործը փակվեց… Կասեմ միայն այսքանը, մնացածը մենք գիտենք…

-Դուք մեղադրում եք, որ մեքենայի տիրոջ` Էդգար Տեր-Աբրահամյանի դեմ, ով նույնպես եղել է մեքենայում, սակայն փրկվել` քրգործ չհարուցվեց: Բացի այն, որ նա ղեկը զիջել է Գեղամին, այլ խնդիր տեսնո՞ւմ եք:

-Ես ոչ մեկին չեմ մեղադրում, ես դատավոր չեմ, չնայած ավելի լավ դատավոր կամ քննիչ կլինեի` ի տարբերություն մի քանի դատավորների ու քննիչների: Բայց, ցավոք սրտի, իմ մասնագիտությունն ուրիշ է:



Ամբողջական հոդվածը կարող եք կարդալ այստեղ