Վլադիմիր Գասպարյանը՝ «Տարվա պաշտոնյա»

«Դե Ֆակտո» ամսագրի խմբագրակազմը 2016թ. «Տարվա Պաշտոնյա» է ճանաչել ՀՀ Ոստիկանապետ Վլադիմիր Գասպարյանին: Վլադիմիր Գասպարյանը իրավմամբ համարվում է մեր իրավական համակարգի հնաբնակներից և իր անուրանալի ու վիթխարի ավանդն է ներդրել՝ մեր պետության համար կարևոևագույն ու կենսական նշանակություն ունեցող ոլորտի կայացման մեջ:

Վլադիմիր Գասպարյանի ֆենոմենը կայանում է նրանում, որ նրան վստահված յուրաքանչուր բնագավառ, շնորհիվ իր բարձր պրոֆեսիոնալիզմի, իր առջև դրված ամենբարդ խնդիրները՝ ժամանակին և անթերի կատարման, իր և իր ենթակաների նկատմամբ ունեցած խստապահանջության, անընդհատ կատարելագործման ու ճիշտ վարվող կադրային քաղաքականության, շատ կարճ ժամանակում վերածվում է օրինակելի և հասարակության լիարժեք վստահությունը վայելող կառույցի:

Առաջին կառույցը, որը կցանկանաինք հիշատակել ՀՀ ՊՆ Ռազմական Ոստիկանությունն է, որի լիարժեք ձևավորումը ու հետագա ձեռքբերումները, բացառապես Վլադիմիր Գասպարյանի ներդրած ջանքերի և մասնագիտական հմտությունների արդյունքում է հնարավոր դարձել:

Երկրորդ կառույցը ՀՀ Ոստիկանությունն էր, որը նույնպես կարիք ուներ արմատական բարեփոխումների, հանրային վստահության նշաձողի բարձրացման, համակարգում առկա թերությունները շտկելու և օրենքի գերակայությունը ամենուր ապահովելու՝ արհեստավարժ ու վճռական տրամադրված ղեկավարի:

2011 թ. նոյեմբերի 1-ին ստանձնելով ՀՀ Ոստիկանության պետի պաշտոնը՝ Վլադիմիր Գասպարյանը այս տարիների ընթացքում կարողացավ կերտել բոլորովին այլ ոստիկանի կերպար, ով լիովին գիտակցում է օրենքի պահապանի իրական դերն ու նշանակությունը և վայելում է հասարակության լիարժեք աջակցությունը իր ամենօրյա բարդ ու պատասխանատու աշխատանքի մեջ: Մեր հասարակությունը մեծ հավատով ու դրական սպասումներով է համակված՝ բազմափորձ գեներալ Վլադիմիր Գասպարյանի յուրաքանչուր նախաձեռնության հանդեպ և բարձր է գնահատում ոստիկան-քաղաքացի փոխհարաբերությունները ջերմացնելու ու հասարակության մեջ առկա արատավոր և հանցածին երևույթները միասնաբար վերացնելու ուղությամբ գործադրվող նրա ջանքերը: Ոստիկանության արձանագրած ակնառու հաջողությունների ու առաջընթացի մասին փաստեցին նաև միջազգային հեղինակավոր կազմակերպությունները, որոնք մեր մայրաքաղաք Երևանը արդարացիորեն ընդգրկեցին աշխարհի ամենապահով ու անվտանգ քաղաքների ցանկում:

ՀՀ Ոստիկանությունը իր ծայրաստիճան հանդուրժողականության ու մարդասիրության ամենացայտուն ապացույցը տվեց հուլիսյան տագնապալի, անկանխատեսելի ու անդառնալի հետևանքներով լի օրերին, երբ մի խումբ զինված և իրենց ապստամբ հորջորջող արկածախնդիրներ երկու շաբաթ շարունակ կաթվածահար արեցին երկրի հասարա-քաղաքական կյանքը և լրջագույն վնաս հասցրեցին մեր երկրի միջազգային հեղինակությանը: ՀՀ Ոստիկանությունը չտրվեց որևէ սադրանքի, այլ շնորհիվ բարձր պրոֆեսիոնալիզմի մինչև վերջին պահը ձեռնպահ մնաց օրենքով իրեն վերապահված գործառույթները իրականացնելուց և հստակ ցույց տվեց բոլորին, որ ի տարբերություն բարիկադի մյուս կողմում գտնվող ահաբեկիչների, ովքեր սառնասրտորեն գնդակահարեցին իրենց իսկ ընտանիքների անվտանգությունն ապահովող ոստիկաններին, իրենց համար անընդունելի է նրանցից որևէ մեկի կորուստը: Մենք պետք է ազգովի հպարտանանք մեր ոստիկաններով, ովքեր իրականում ընտրել են վտանգներով լի և հիացմունքի ու դրվատանքի արժանի աշխատանք, ընդսմին իրենց կյանքը վտանգելով ապահովում են մեր և մեր երեխաների անվտանգ առօրյան:

Կրկին անգամ շնորհավորում ենք վաստակաշատ և փորձառու գեներալ, պետականամետ գործիչ, մարդկային բարձր որակներով օժտված, հայրենիքի շահը ամեն ինչից վեր դասող ու մեր ազգի բացառիկ նվիրյալ՝ ՀՀ Ոստիկանապետ, գեներալ-լեյտենանտ Վրադիմիր Գասպարյանին «Տարվա Պաշտոնյա» ճանաչվելու կապակցությամբ: