Վլադիմիր Պուտինը ստրատեգիական սխալ թույլ տվեց. ՆԱՏՕ-ի գլխավոր քարտուղար

ՌԴ նախագահ Վլադիմիր Պուտինը ստրատեգիական սխալ թույլ տվեց՝ թերագնահատելով ուկրաինացիների խիզախությունը և դաշնակիցների աջակցությունը Ուկրաինային։ Այս մասին չորեքշաբթի օրը հայտարարել է ՆԱՏՕ-ի գլխավոր քարտուղար Յենս Ստոլտենբերգը։

«Պուտինը մի շարք խոշոր և ստրատեգիական սխալներ թույլ տվեց, երբ ներխուժեց Ուկրաինա։ Այդ սխալներից մեկն այն էր, որ նա թերագնահատեց ուկրաինացիներին, նրանց քաջությունը, նրանց նվիրվածությունը՝ պայքարելու իրենց երկրի համար և պաշտպանելու այն»,- ասել է դաշինքի ղեկավարը Լոնդոնում Մեծ Բրիտանիայի վարչապետ Ռիշի Սունակի հետ հանդիպումից հետո։

Պուտինի «մեկ այլ սխալ», ասել է նա, այն է, որ նա թերագնահատել է դաշնակիցների և ՆԱՏՕ-ի գործընկերների կարողությունը՝ արդյունավետ աջակցություն ցուցաբերելու Ուկրաինային:

«Ուկրաինայի զինված ուժերի հաղթանակներն ու հաջողությունները ձեռք են բերվել ուկրաինացի զինվորների խիզախության և արիության շնորհիվ։ Բայց, իհարկե, կարևոր է նաև այն աջակցությունը, որը նրանք ստանում են Միացյալ Թագավորությունից, ՆԱՏՕ-ի դաշնակիցներից և գործընկերներից»,- ասել է Ստոլտենբերգը։

Գլխավոր քարտուղարը զգուշացրել է, որ «եթե Պուտինը հաղթի Ուկրաինայում, դա ոչ միայն աղետ կլինի ուկրաինացիների համար, այլև մեզ ավելի խոցելի կդարձնի»։

Ստոլտենբերգը մեկնաբանել է նաև Խերսոնից զորքերը դուրս բերելու ռուսական հրամանատարության որոշումը։ Նրա խոսքով, վերջնական եզրակացություններ անելը դեռ ժամանակավրեպ է, քանի որ դեռ պետք է տեսնել, թե «ինչ է իրականում տեղի ունենում տեղում»։