Խաչիկ Ասրյանն ապրում է 3-րդ մասի սովորական, հիպոթեքով ձեռք բերված բնակարանում

Մեր էլ փոստին ստացվել է նամակ խաչիկ Ասրյանից,Fnews.am էլ օրաթերթում հրապարակված  ֆեյբուքյան մի գրառման հետ կապված, որի բովանդակությունը ներկայացնում ենք ստորեւ.

«Հայոց Արծիվներ» հայրենասիրական հասարակական կազմակերպության Նախագահությունը ծանոթանալով լրատվական կայքէջերում տպագրված «Համ առանձնատուն է ձեռք բերում, համ էլ շեֆի ոտքի տակն է փորում» նյութին, հայտարարում ենք.
«Այն, ինչ տպագրված է Fnews.am և Asekose.am կայքէջերում, բացարձակ զրպարտություն է, հայի տականքի կողմից պատվիրված անտրամաբանական վայրահաչություն, ազնիվ հայորդու հանդեպ՝ հայրենադավություն, և ամենակարևորը՝ հայրենասիրության պակասի մեր օրերում, մեր հայրենիքում հայրենատիրության բարոյական օազիզ ստեղծող անձի նկատմամբ անթույլատրելի քարկոծություն՝ հանձին «Հայոց Արծիվներ» հայրենասիրական հասարակական կազմակերպության նախագահ Խաչիկ Ասրյանի` խնդիր ունենալով ոչնչացնել Հայաստանում ձևավորվող կայուն հայրենասիրական ուժը, թուրքական ձեռագրով նսեմացնելով ու վարկաբեկելով նրա տարիների վաստակը: Մենք խոր վրդովմունքով ծանոթացանք կազմակերպության Առաջնորդի մասին պատվիրված էլեկտրոնային լուտանքներին և հայտնում ենք ձեզ, որ դրանով դուք ոչ իրեն և ոչ էլ մեզ չեք կարող հիասթափեցնել, ընդհակառակը՝ այս քայլը մեզ էլ ավելի սթափեցրեց, հուշելով, որ ոչ միայն դրսում, այլև հայրենիքի ներսում էլ կան ազգադավ ուժեր, որոնց նպատակը միշտ էլ եղել է հայրենասիրական ուժերի ավերը … «Հայերի խնդիրը նրանում չէ, որ աշխարհում կան թուրքեր, նրանում է, որ կան թուրքանման հայեր»՝ Գարեգին Նժդեհ:
Բանսարկության հեղինակներին հայտնում ենք, որ Խաչիկ Ասրյանն ապրում է ոչ թե Հյուսիսային պողոտայում կամ բազմաբնակարան էլիտար շենքերում, այլ՝ Երևան քաղաքի 3-րդ մասի սովորական, ուշադրությունից դուրս մնացած բազմաբնակարան շենքերից մեկում՝ հիպոթեքով ձեռք բերված բնակարանում, որը մինչև օրս էլ շարունակում է վճարել: Նա ո՛չ դղյակ ունի և ո՛չ էլ առանձնատուն: Դալտոնիզմով տառապողներին ասենք, որ Երկաթուղայինների 2-րդ փողոցի 2/3 հասցեում գտնվող տունը «Հայոց Արծիվներ» հայրենասիրական հասարակական կազմակերպության կենտրոնական գրասենյակն է, որը վարձակալության հիմունքներով տրված է կազմակերպությանը 2012 թվականի ապրիլի 18-ից:
Խաչիկ Ասրյանն այն աշխատասեր և պատասխանատու պաշտոնյայի տեսակն է, ով ոչ թե որևէ մեկի ոտքի տակն է փորում, այլ ՀՀ սպորտի և երիտասարդության հարցերի փոխնախարարի պաշտոնում շուրջ 8 տարի բացառապես հանդես գալով իրեն վստահված ոլորտի անընդհատ զարգացման գործընթացներում՝ միշտ ջերմ աշխատանքային հարաբերությունների մեջ է եղել և շարունակում լինել նախարարության և՛ աշխատակազմի և՛ նախարարի հետ: Տարիների մեր համատեղ աշխատանքի մեջ մենք միշտ ականատեսն ենք եղել նրա բացառիկ անշահախնդրության, հայրենասիրության, ընկերասիրության ու մարդասիրության ամենավեր արժեքների դրսևորմանը, որը հպարտությամբ ենք ընդունել` երդվելով մշտապես լինել իր կողքին: Ինչ վերաբերում է զրպարտանք-նյութին Խաչիկ Ասրյանի արձագանքին, ապա դա այդպես էլ պիտի լիներ, որովհետև ազնիվ մարդը չի կարող անազնիվ պահվածքի նկատմամբ գուրգուրանք ցուցաբերել:
Զսպե՛ք ձեր չարությունն ու նենգությունը, մի´ շարունակեք ազգի դավաճանների ստոր գործելաոճը՝ վատաբանելով հայրենասեր հայորդուն: Եվ հիշեք, նա, ով քար է նետում հայրենաշունչ հայորդու` Խաչիկ Ասրյանի անվանը, քար է նետում իր հայրենիքի, Հայոց բանակի և պետականության վրա։
Անշուշտ դատաիրավական մարմինները կճշտեն և կհայտնաբերեն զրտպարտության ակունքներն ու պատվիրատուներին»:

«Հայոց Արծիվներ» հայրենասիրական հասարակական
կազմակերպության Նախագահություն