Ղալաթ ա անում ըտենց մտածողը. Շուշան Պետրոսյան

Հարցազրույց Ազգային ժողովի հանրապետական պատգամավոր, երգչուհի Շուշան Պետրոսյանի հետ

- Էլեկտրաէներգիայի թանկացման դեմ քաղաքացիների ընդվզումը դեռ շարունակվում է, եւ կարծես ոչ քաղաքացիներն են զիջում, ոչ էլ իշխանությունները: ԱԺ մերձակայքում զրահատեխնիկա է հայտնվել: Դուք, ՀՀԿ-ական լինելուց բացի, նաեւ հայտնի երգչուհի եք: Այցելե՞լ եք Բաղրամյան պողոտա, կարծես չարձագանքեցիք ցուցարարների եւ ոստիկանների միջեւ «կենդանի պատ» նախաձեռնությանը, ինչո՞ւ:

- Ես ուղղակի չեմ սիրում… Հիմա լավ չեմ, անկեղծ ասած՝ դրա համար եմ դահլիճից դուրս եկել, եկել սենյակ… Շատ զիլ երեխեք են, ես իրանց ցավը տանեմ:

- Իսկ ինչո՞ւ չեք այցելում:

- Տղաս է այնտեղ:

- Փաստորեն, դուք նույնպես կիսում եք ցուցարարների դիրքորոշումը, այդ դեպքում իշխանությունն ինչո՞ւ չի ընկրկում եւ կատարում նրանց պահանջը:

- Բայց իշխանությունն առաջարկներ արեց, չէ՞, նախագահը երկու անգամ հանդիպման առաջարկ արեց: Ես կուզեի այդ հանդիպումը լիներ, որովհետեւ իրենք կարգին երեխեք են, իրենք չեն քաղաքականացնում այն, ինչը որ մեր բոլորիս՝ քաղաքացիների խնդիրն է: Ես, անկեղծ ասած, չեմ ուզում դա փչացնենք, կողքից շատ են փորձում, ուզում եմ, որ իրենց հանգիստ թողնեն:

- Այսինքն՝ Ձեզ հայտնի է, որ որոշ մարդիկ ուզում են «փչացնե՞լ» շարժումը, ովքե՞ր են նրանք:

- Դուք լավ գիտեք, դուք շատ եք այնտեղ լինում:

- Ակնարկում եք քաղաքական գործիչների՞ն, որոնք մասնակցում են այդ ցույցերին:

- Չեմ ուզում, որ քաղաքականացնեն, ամեն մեկն իր ներկայությամբ ուզում է ինչ-որ մաս վերցնել նրանցից, դա իրենցը չի, դա այդ երեխաներինն է:

- Այդուհանդերձ, ի՞նչը Ձեզ հետ պահեց, որպեսզի չգնաք, Ձեր ասած, այդ լուսավոր երիտասարդության կողքին կանգնեք, արդյոք ՀՀԿ-ի պատգամավորական մանդա՞տը, կամ գուցե Արմեն Աշոտյանի նկատմամբ ցուցարարների վերաբերմունքի պատճառո՞վ այդ քայլին չդիմեցիք:

- Չէ, բոլորովին: Ինչու, ՀՀԿ-ից իմ ընկերներից շատ շատերն այնտեղ ներկա են եղել: Աշոտյանի հետ կապված միջադեպն ինձ դուր չի եկել, որովհետեւ Աշոտյանն ամենահասու նախարարն է, հենց երիտասարդների համար: Արձագանքում է յուրաքանչյուրի որեւէ հարցի, որեւէ դիմումի՝ ընդհուպ սոցցանցերից սկսած: Ինքն ամենահասունն է, եւ ես անհարիր եմ համարում, ինձ համար անընդունելի է այդ ձեւակերպումները, այդ բառերը, գոռալը: Ո՞նց, ո՞նց կարելի է:

- Եթե Դուք լինեիք այնտեղ, Ձեզ ինչպե՞ս կընդունեին՝ իբրեւ հայտնի երգչուհո՞ւ, թե՞ ՀՀԿ-ական պատգամավորի:

- Պատգամավոր լինելը դա խարան չի, դա եւս մի աշխատանքի ոլորտ է, որն ավելի ծանրաբեռնում է ինձ: Ես չգիտեմ՝ դուք ինչ չափանիշներով եք չափում պատգամավոր լինելը, բայց դա եւս աշխատանք է: Այսինքն, ի՞նչ է նշանակում՝ «բայց Դուք պատգամավոր եք»: Ինչ ա, պատգամավորը խարա՞ն ա, ի՞նչ ա:

- Հանրապետական պատգամավորի կոչումը շատերն են, այո, խարան համարում, այդ թվում՝ ցուցարարները, եւ դա երեւաց Բաղրամյան պողոտայում:

- Ղալաթ ա անում ըտենց մտածողը, որովհետեւ կան լավ մարդիկ եւ կան վատ մարդիկ: Կան բարոյական իրենց աշխատանքին մոտեցող մարդիկ, սկզբունքային մարդիկ եւ կան վատ մարդիկ՝ անկախ կուսակցություններից: Իսկ վատ կուսակցականներ կան բոլոր կուսակցություններում եւ կան լավ կուսակցականներ, հիմա ինչի՞ եք էս հարցը տալիս ինձ: Իսկ ոչ ադեկվատ մարդիկ ամեն տեղ էլ կան, ոչ ադեկվատ մարդիկ էին Աշոտյանին այդպես բարձր ձայնով վիրավորողները… Ես ակտիվիստներից շատերի հետ եմ խոսել, իրենց էլ դուր չի եկել դա, նույնիսկ դա պետք չի ակտիվիստների վրա փաթաթան անել:

- Հիմա ստեղծված իրավիճակի ելքը Դուք ինչպե՞ս եք պատկերացնում, Ձեր ասած՝ լուսավոր ակտիվիստները շարունակում են չընկրկել, իշխանությունը՝ նույնպես: Տեսե՞լ եք՝ ԱԺ շենքի դիմաց զինտեխնիկա է շարված:

- Չէ, չեմ նայել, ոչինչ չեմ նկատել, որովհետեւ այս տարածքում շատ վաղուց չեմ եղել: Կարծում եմ՝ ամեն ինչ պետք է շատ խաղաղ տեղափոխել Օպերայի հրապարակ: Այսինքն՝ այն, ինչ որ ասում էին այս երիտասարդների շարժման ղեկավարները:

- Նրանց արարքը որակվեց իբրեւ «դավաճանություն», Բաղրամյանում մնացածները պնդում են, որ թանկացման որոշումը կասեցնելու իրենց պահանջը շարունակում է անկատար մնալ, ուստի սխալ է հեռանալ Բաղրամյանից:

- Այսինքն, եթե ինչ-որ մեկը սթափ, ոչ քաղաքականացված, որպես քաղաքացի է իր դիրքորոշումը հայտնում, ուրեմն դավաճանությո՞ւն է:

Մանրամասները՝ Հրապարակ թերթի այսօրվա համարում։