Ղարաբաղի «անջատողական» առաջնորդներն արժանի պատիժ են կրելու․ Ալիև

Ադրբեջանի նախագահ Իլհամ Ալիևն ասել է, որ կալանքի տակ գտնվող, «այսպես կոչված, ղարաբաղյան անջատականների առաջնորդներն արժանի պատիժ են կրելու»

Այդ մասին Ալիևը հայտարարել է Ստեփանակերտում՝ Ադրբեջանի պետական դրոշի բարձրացման արարողությունից հետո:

Ալիևը վիրավորական և հեգնական մեկնաբանություններ է հնչեցրել Լեռնային Ղարաբաղի նախկին հայ ղեկավարների՝ այսօր Բաքվի բանտում պահվող Արկադի Ղուկասյանի, Բակո Սահակյանի և Արայիկ Հարությունյանի հասցեին:

«Ադրբեջանի դրոշը ծածանվում է Խանքենդիում (Ստեփանակերտում), և դա պետք է նրանց համար դաս լինի»,- ասել է Ալիևը:

Ալիևը նշել է, որ «ղարաբաղցի անջատականները» երբեք ուշադրություն չեն դարձրել իր նախազգուշացումներին այն մասին, որ «Ադրբեջանը վաղ թե ուշ կա՛մ դիվանագիտական, կա՛մ զենքի ուժով կազատագրի Ղարաբաղը»:

«Նրանք կարծում էին, թե իմ ասածը դատարկ խոսքեր են: Ոչ: Այն ամենն, ինչ ասել եմ՝ իրականացրել եմ, դա բոլորը գիտեն, այդ թվում՝ Հայաստանում, և թող չմոռանան Հայրենական պատերազմը և հակաահաբեկչական միջոցառումները»,- հայտարարել է Ալիևը:

Նա դատապարտել է նաև արևմտյան երկրներին, ասելով, որ երբ հայերը գրավում էին Ադրբեջանի հողերը, ոչ մի երկիր Ադրբեջանին չսատարեց, բարոյական աջակցություն չցուցաբերեց:

«Տեսեք, թե այսօր որ երկրներն են առավել թշնամաբար տրամադրված Ադրբեջանի նկատմամբ՝ հենց այն երկրները, որոնք 1992-93 թվականներին աջակցեցին Հայաստանին, դրդեցին օկուպացիայի, աջակցեցին օկուպացիային ու արդարացրին այն, 30 տարում ոչինչ չի փոխվել»,- ասել է Ալիևը: