Խաղաղության պայմանագրի դրույթի գաղտնազերծումը խորացրել է ընդդիմադիրների կասկածները

«Խաղաղության պայմանագրի տեքստի մեջ կա մի համաձայնեցված հոդված, որտեղ ասվում է, որ կողմերը չեն կարող հղվել իրենց օրենսդրությանը՝ այս պայմանագրով ստանձնած որևէ պարտավորություն չկատարելու համար». - վարչապետի՝ խաղաղության պայմանագրի նախագծի դրույթներից մեկի գաղտնազերծումը ավելի է խորացրել ընդդիմադիրների կասկածները, թե նոր Սահմանադրությունը պարտադրվում է Բաքվից:

«Հայաստանը չի կարող ստորագրել մի փաստաթղթի տակ, որը վեր կլինի երկրի Սահմանադրությունից», - խորհրդարանում առավոտյան հայտարարում էր Դաշնակցությունից Գեղամ Մանուկյանը։ Կարծում է՝ եթե պայմանագիրը ստորագրվի, կհակասի Մայր օրենքին, ու նաև դրա համար է իշխանությունն ուզում մինչ այդ փոխել Սահմանադրությունը, այնտեղից հանել Հայաստանի ու Լեռնային Ղարաբաղի վերամիավորման մասին Անկախության հռչակագրին հղումը։