Խնջույքի ժամանակ սպանված երիտասարդի մայրը ճանաչվել է տուժողի իրավահաջորդ.

«Առավոտ»-ն անդրադարձել է այս տարվա հոկտեմբերի 29-ին Գյումրիում տեղի ունեցած մի սպանության դեպքի: Խոսքը Արտյոմ Ադանալյանի սպանության մասին է, ով մահացել էր հիվանդանոց տեղափոխելու ճանապարհին:

Լրատվամիջոցը հիշեցնում է, որ դեպքի կապակցությամբ Շիրակի մարզային քննչական վարչությունում հարուցվել էր քրեական գործ, կատարվում է նախաքննություն:

«Առավոտ»-ը զրուցել է սպանված երիտասարդի մոր՝ Ռուզան Ադանալյանի հետ, ով հայտնել է, որ ինքը դիմել է նախաքննական մարմնին և ցանկություն հայտնել իրականացնել որդու իրավունքներն ու պարտականությունները:

Նոյեմբերի 6-ին, քննիչի որոշմամբ, Ա.Ադանալյանի մայրը ճանաչվել է տուժողի իրավահաջորդ:

Լրատվամիջոցի հետ զրույցում՝ տուժողի մայրն իր զայրույթն է հայտնել՝ Շիրակի մարզպետարանի առողջապահության վարչության պետ Հովհաննես Հովհաննիսյանի անհարգալից արտահայոտւթյհունների կապակցությամբ և դրանք անվանել ապատեղեկատվություն: խոսքը, մասնավորապես, վերաբերում է խնջույքի մասնակիցների, ավելի կոնկրետ՝ սպանվողի հոր, ընկերոջ և եղբոր հարբած լինելուն:

«Մի ընտանիք, որտեղ մի որդին հարբած է, մյուսն էլ սպանված, հատակին ընկած, էլ ի՞նչ եք սպասում»,- թերթը մեջբերում է Հովհաննես Հովհաննիսյանի խոսքը:

Ըստ տուժողի իրավահաջորդի՝ դեպքի օրը եղել են 8-10 հոգի, որոնց համար պետք է միջնորդի, որպեսզի ներկայանան նախաքննական մարմնին:

Թերթը միաժամանակ նշում է, որ հետախուզման մեջ գտնվող Արթուր Մարտիրոսյանը նոյեմբերի 6-ին ինքնակամ ներկայացել է քննչական կոմիտեի Շիրակի մարզային քննչական վարչություն:

Քրեական գործը հարուցվել է ՀՀ քրեական օրենսգրքի 104-րդ հոդվածի 1-ին մասով: Ա.Մարտիրոսյանին այդ հոդվածի հատկանիշներով էլ մեղադրանք է առաջադրվել:

Հոդվածն ամբողջությամբ կարող եք կարդալ «Առավոտ» օրաթերթի` 22.11.2014թ. համարում: