Խոցված ուղղաթիռին մոտենալու և անձնակազմին փնտրելու աշխատանքները դեռ չեն սկսվել

Ինչպես հայկական, այնպես էլ ադրբեջանական կողմի հետ ԿԽՄԿ-ն երկխոսություն է վարում իր ձևաչափին համաձայն՝ պարզելու համար ադրբեջանական ԶՈՒ-ի կողմից խոցված հայկական ուղղաթիռի դեպքի հանգամանքները: Այդ մասին «Փաստինֆո»-ի թղթակցի հետ զրույցում ասաց ԿԽՄԿ-ի հայաստանյան գրասենյակի հաղորդակցման ծրագրերի ղեկավար Զառա Ամատունին:

Վերջինիս խոսքով՝ ԿԽՄԿ-ի համար առանցքային է, որպեսզի արագ իրականացվեն ուղղաթիռին մոտենալու և փնտրման աշխատանքները, որոնք դեռևս չեն սկսվել:

Ինչպես ավելի վաղ հաղորդել ենք, ղարաբաղա-ադրբեջանական սահմանի արևելյան հատվածի օդային տարածքում նոյեմբերի 12-ին՝ ժամը 13:45-ի սահմաններում, ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման արդյունքում խոցվել է հայկական ՄԻ-24 ուղղաթիռը:

Այդպիսով՝ ադրբեջանցիների կողմից հրադադարը խախտելու հետեւանքով կյանքից զրկվել են մայոր Սերգեյ Ալեքսանդրի Սահակյանին, օդաչու-օպերատոր, լեյտենանտ Ազատ Արթուրի Սահակյանը, կողային տեխնիկ, ավագ լեյտենանտ Սարգիս Գագիկի Նազարյանը։

Մեր տեղեկություններով՝ քրեական գործ է հարուցվել ազգային ատելության շարժառիթով երկու եւ ավելի անձանց սպանության, գույքի դիտավորյալ ոչնչացնելու համար։