Ըստ Համաշխարհային բանկի՝ 2015 թվականին նավթի գները կշարունակեն նվազել

Նավթի համաշխարհային գների անկումը կարող է լուրջ խոչընդոտ դառնալ նավթի նոր հանքավայրերի ուսումնասիրությունների, այդ թվում՝ ստորջրյա նավթարդյունաբերության համար:

Նման կարծիք է հայտնել Համաշխարհային բանկը հունվարի 7-ին հրապարակված իր զեկույցում: Զեկույցի հեղինակների կանխատեսմամբ, նավթի գնի անկումը շարունակական կլինի նաև առաջիկա տարիներին:

Այն ժամանակահատվածը, երբ 1 բարել նավթի գինը համաշխարհային շուկայում գերազանցում էր 100 դոլարը, զեկույցի հեղինակների համոզմամբ, ավարտվել է, և 2015 թվականը նշանավորվելու է վառելիքի ցածր գներով: Նույն զեկույցի համաձայն՝ այս միտումը կշարունակվի անգամ 2016 թվականին: Նավթի գները հաջորդ տարի, ըստ ՀԲ զեկույցի, կաճեն միայն աննշան չափով:

Նման իրավիճակը փորձագետները բացատրում են ամբողջ աշխարհում նավթի ու նավթամթերքների արդյունահանման չափերի ու առաջարկի ավելացմամբ, ինչպես նաև՝ աշխարհաքաղաքական իրավիճակի թուլացմամբ ու դոլարի փոխարժեքի աճով:

Նավթի գնի անկումը, ըստ զեկույցի հեղինակների, կարող է լուրջ մարտահրավեր դառնալ նավթ արդյունահանող երկրների համար, ինչն էլ անխուսափելիորեն կազդի դրանց տնտեսության վրա:

Փոխարենը, զեկույցում ասվում է, որ նավթի ցածր գինը կարող է դրական ազդեցություն ունենալ համաշխարհային տնտեսության վրա, քանի որ վառելիքի գների անկումը 30%-ով կարող է համաշխարհային ՀՆԱ-ի 0,5% ավելացման պատճառ դառնալ:

Ի դեպ, լոնդոնյան միջմայրցամաքային բորսայում փետրվարյան ֆյուչերսային գործարքներով նավթի մատակարարման գինը նվազել է միանգամից 21 ցենտով՝ կազմելով 1բարելի դիմաց 50,89 դոլար, իսկ նյույորքյան բորսայում նավթի 1 բարելի գինը ներկայում կազմում է 48,65 դոլար:

Փորձագետները վստահ են, որ վառելիքի գների անկումն այսքանով չի սահմանափակվի:

Նշենք, որ Հայաստանում նավթի համաշխարհային գների գրեթե 40%-անոց անկումն առայժմ որևէ կերպ չի անդրադարձել բենզինի գների վրա: