Յուվեցի Կարոն արձագանքում է

Քաղցրաշեն գյուղի մի խումբ խաղողագործներ առ այսօր չեն ստացել իրենց գումարները: Վերջիններս իրենց խաղողը 45-70 դրամով հանձնել են ԱԺ նախկին ԲՀԿ–ական պատգամավոր Կարո Կարապետյանին (Յուվեցի Կարո) պատկանող Քաղցրաշենի բերքի վերամշակման գործարան եւ առ այսօր չեն ստացել իրենց գումարները: «Խայտառակություն է՝ մենք ամբողջ տարին չարչարվեցինք, էդքան բերք հավաքեցին, կոպեկներով իբր հանձնեցինք, իսկ այսօր առանց կոպեկի ենք մնացել, չեն տալիս, սրիկաները չեն տալիս»,-Fnews.am-ի հետ զրույցում ասել էր գյուղացիներից Կարեն Խաչատրյանը: Խաղողագործը տեղեկացրել էր նաեւ, որ իրենց խոսք էին տվել, որ մինչև դեկտեմեբերի 20-ը ամբողջությամբ կվճարեն.«Հիմա էլ ասում են, թե մարտին-մայիսին նոր կտան: Ինձ պետք է 500 մլն դրամ տան, բայց էնպես չի, որ մենք միանգամից էդքան գումար ենք ուզում, թող մաս-մաս տան, միայն թե տան, մենք էլ Նոր տարի անենք, մենք էլ էդ ազիզ օրը նշենք»,-դժգոհել էր խաղողագործը:

Fnews.am-ի այս հրապարակմանը, քիչ առաջ արձագանքեց ԱԺ պատգամավոր Կարո Կարապետյանը՝ Յուվեցի Կարոն, ու ասաց հետեւյալը:
-Ա'յ Ձեր ցավը տանեմ, էդ նույն բանն ա, որ Հրազդանում մի բան լինի, ասեն ես դրա հետ կապ ունեմ: 
-Ի՞նչ կա որ, ամեն ինչ էլ հնարավոր է...

-Դե չէ էլի, տենց չի, ես էդ խաղողի գումարների հետ կապ չունեմ:

-Իսկ «Վինա ՍՊԸ»-ի հետ է՞լ կապ չունեք, որը որ իրականացրել է խաղողի մթերումը: 

-Հարգելիս, «Վինա ՍՊԸ»-ն ամբողջությամբ պատկանում է Ավետիք  Գալստյանին, ես դրա հետ ի՞նչ կապ ունեմ: 

Ի դեպ, «Վինա ՍՊԸ»-ի գործադիր տնօրեն Ավետիք Գալստյանն էլ, ով այսպես ասած «աշխատացնում է» է այդ գործարանը, մեզ հետ զրույցում նկատեց.

-Ես գործարանում խաղողը մթերելուց առաջ խոսել եմ, ասել եմ, որ մարտ–ապրիլ ամսին նոր կվճարեմ, թե մարզպետը ինչ է խոստացել, ես դրա հետ կապ չունեմ: Երևի Նոր Տարի է, դրա համար էլ գումար են ուզում, ես գարնանը կվճարեմ:

Հ.Գ

Միշտ էլ խեղճ գյուղացին վարել-ցանել է, տանջվել ու արեւների տակ ճռռացել է, որ ուտողն ուտի, իսկ դառը բանող էլ ինչպես միշտ դատարկ նստի: Տեսնես հայրենի կառավարության ներկայացուցիչներն ի՞նչ են  մտածում այս մասին, եւ ինչքանով են հետաքրքրված, թե ինչպես կդիմավորի Ամանորը այն նույն հողի հետ կռիվ տվող մարդը, որի «ուսերով» եկել ու բազմել են փափուկ աթոռներին: